Aprelin 10-dan başlayaraq Naxçıvan Muxtar Respublikasında məktəblilərin kütləvi profilaktik müayinəsinə başlanılıb.

Aztibb.az xəbər verir ki, Şərur Rayon Uşaq Xəstəxanasının bir qrup həkimi şagirdlərin yaz mövsümündə tibbi müayinələrini aparmaq üçün rayonun Şəhriyar kənd tam orta məktəbində olub. Pediatr, oftalmoloq, stomatoloq, cərrah-ortoped, LOR, nevropatoloq və digər ixtisaslı həkimlərdən ibarət briqada məktəbin 120 şagirdini dərin tibbi müayinələrə cəlb edib.

Tibbi müayinələr zamanı dəqiqliyə ciddi nəzarət edilib, dərin müayinə və müalicəyə ehtiyacı olan uşaqlar ixtisas həkimlərinə yönləndirilib. Uşaqlar arasında şəxsi gigiyena qaydalarına əməl edilməsinə, COVID-19 virusundan qorunmaya dair maarifləndirici söhbətlər də aparılıb.

Yaz mövsümünün profilaktik tibbi müayinələri mayın 25-dək davam etdiriləcək.

Qeyd edək ki, uşaqlar arasında profilaktik kütləvi dövri tibbi müayinələr Naxçıvan Muxtar Respublikası Ali Məclisi Sədrinin 2018-ci il 9 oktyabr tarixli Sərəncamı ilə təsdiq olunmuş “Naxçıvan Muxtar Respublikasında uşaqların icbari dispanserizasiyadan keçirilməsinə dair 2018-2022-ci illər üçün Dövlət Proqramı” çərçivəsində aparılır.