Göbələk demək olar ki, bütün fəsillərdə ən çox istifadə olunan qidalardan biridir. O, düzgün istifadə olunmadıqda zəhərlənməyə, hətta ölümə səbəb ola bilər. 

Göbələk zəhərlənməsi xüsusilə yağışların bol olduğu dövrlərdə baş verir. Təbii mühitdə yetişən göbələklər arasında zəhərli olanlarına daha çox rast gəlmək olar. Zəhərli olan və olmayan göbələklərin görünüşündəki fərqlər isə ayırdedici xüsusiyyətə malik deyil. Bu səbəbdən də məlumatsız şəkildə yeyilən göbələyin zəhərlənməyə səbəb ola biləcəyi unudulmamalıdır.

Zəhərlənmə əlamətləri göbələyin tərkibində olan zəhərin xüsusiyyətlərindən asılı olaraq fərqli ola bilər. Əlamətlər bəzi göbələk növlərinin yeyilməsindən 2 saat sonra, bəzi növlərdə isə 6 saat sonra ortaya çıxır.

Aztibb.az xəbər verir ki, göbələklə zəhərlənmə özünü aşağıdakı əlamətlərlə büruzə verir:

- qarında ağrılar;
- yuxuya meyillilik;
- aşağı arterial təzyiq;
- gözdə toranlaşma;
- üz və boyunda qızarma;
- taxikardiya;
- ağızda metal dadı;
- tərləmə;
- ürəkbulanma;
- qusma.

Xəstəyə ilk tibbi yardım:

Göbələk yeyildikdən sonra hansısa bir narahatlıq hiss olunan zaman xəstəni təcili xəstəxanaya çatdırmaq lazımdır. Xəstəxanaya çatana kimi xəstə qusdurulmalıdır. Əgər qida qəbulunun üstündən bir müddət keçibsə, xəstəyə bol duzlu maye içirdib təcili qusdurmağa çalışmaq lazımdır. Qaytarma və ishal orqanizmin qəbul eləmək istəmədiyi bir şeyi, xaricə çıxarmaq üçün özünü yüngülləşdirmə vasitəsidir.

Bir çox hallarda xəstə xəstəxanaya çatana qədər komaya düşür. Mümkün olarsa, həkimə çatana qədər xəstənin vena daxilinə artopin məhlulu yeritmək məqsədəuyğundur.