Orucluğun başlamasına sayılı günlər qalır. Ötən illərdən fərqli olaraq, COVID-19-la əlaqədar orucluqla bağlı müxtəlif suallar yaranır: COVID-19 xəstələri oruc tuta bilərmi? Daha əvvəl COVID-19 keçirənlər, yaxud da bu xəstəliyə yoluxmayanlar necə etməlidirlər ki, immunitetləri aşağı düşməsin? Yaxud da pandemiya dövründə oruc tutmaq nə dərəcədə düzgündür?

 

Aztibb.az xəbər verir ki, Mərkəzi Gömrük Hospitalının infeksionist həkimi Mədinə Abdullayeva bildirib ki, COVID-19 keçirənlər tamamilə yaxşılaşmadan oruc tuta bilməzlər. Ağciyər pnevmoniyası 30-40 faizdən çox olanlar COVID-19 keçirdikdən sonra azı 3 ay oruc tuta bilməzlər. Bu şəxslərin tez-tez qidalanması və bol maye qəbul etməsi lazımdır. COVID-19 olanlar oruc tuta bilməzlər. Çünki xəstəliklə əlaqədar bu şəxslər həddindən artıq tərləyir və maye itirirlər. Onların bədənində mayenin miqdarı artmalıdır. Eyni zamanda, az-az və tez-tez qidalanmaları lazımdır. Oruc tutarkən isə bu mümkün deyil:

 

"COVID-19 keçirməyən sağlam şəxslərə gəldikdə isə, qeyd edim ki, onlar da iftar və imsaqda kifayət qədər maye qəbul etməlidirlər. Orucu açarkən, ya da imsaq zamanı yeməkdən imtina etmək olmaz. Mütləq şəkildə qidalanmaya nəzarət etmək, bol protein, meyvə-tərəvəz qəbul etmək lazımdır. Xüsusən də C vitamini ilə zəngin qidalar qəbul etmək lazımdır ki, immunitet zəifləməsin. Yəni, menyu protein, karbohidrat, vitamin və minerallarla zəngin olmalıdır. Menyuda ağ və qırmızı ət də yer almalıdır. Bütün bunlara riayət olunarsa, insan oruc tutduğu müddətdə immuniteti aşağı düşməz".