Viktor Çanqa Kardioloji Tədqiqatlar İnstitutunun alimləri ürək tutmasından (infarkt) sonra zərər görmüş əzələləri bərpa etməyə kömək edəcək gen aşkar ediblər. Tədqiqatçılar Danio-rerio balıqlarında ürək tutmasından sonra bölünməyə və çoxalmağa imkan verən hüceyrələri aktivləşdirən genetik "yanıb-sönmə" funksiyası müəyyən ediblər. Bu, tam regenerasiyaya və zərər görmüş ürək əzələsinin sağalmasına imkan verəcək.

Aztibb.az meddaily.ru-ya istinadla xəbər verir ki, Klf1 "yanıb-sönmə" geni həyati vacib məqamlarda işə düşür, ürək tamamilə bərpa edildikdə isə fəaliyyətini dayandırır. Başqa sözlə, Klf1 geni ürəyin erkən inkişafında heç bir rol oynamır, onun regenerasiya xüsusiyyətləri isə yalnız ürək travmasından sonra fəaliyyətə başlayır.

Bu gen ürək əzələsinin zədələnməmiş hüceyrələrini daha güclü edir və onların metabolik xarakteristikalarını dəyişdirir. Bu, hüceyrələrə bölünməyə və yeni hüceyrələr yaratmağa imkan verir. Bu genlər balıqlardan götürüldükdən sonra balığın ürəyi travmadan sonra özünü bərpa etmək qabiliyyəti tamamilə itirib.

Qeyd edək ki, tədqiq edilmiş balıqlar 70%-dən çox insan geninə malikdirlər. Bu isə onların sınaqlar zamanı mükəmməl nümunə kimi istifadə olunmasına imkan verir.

Mütəxəssislər bu tədqiqatdan sonra insanda da ürəyin bərpası prosesinin aktivləşdirilməsi imkanını istisna etmirlər.