Uşaqlarda astma xəstəliyinin ƏLAMƏTLƏRİ - Pediatr Günay Rəsulova - aztibb.az AZƏRBAYCANIN SƏHİYYƏ XƏBƏR PORTALI

Uşaqlarda astma xəstəliyinin ƏLAMƏTLƏRİ - Pediatr Günay Rəsulova

12.04.2021 16:57

Astma diaqnozu qoymaq üçün əsas köməkedici müayinə - tənəffüs testləri - spirometriyadir ki, bu müayinə 5 yaşdan yuxarı uşaqlara tətbiq oluna bilir. Astmanın qarşısını almaq üçün uşaqları həssas olduğu qida və ya respirator allergenlərdən maksimum uzaq tutmaq lazımdır.

Aztibb.az xəbər verir ki, bunu tanınmış həkim-pediatr Günay Rəsulova deyib. Astma uşaqlarda ən sıx rast gəlinən xroniki tənəffüs yolu xəstəliklərindəndir. Allergik bronxit diaqnozu yoxdur. Əgər uşaqlarda aşağıda sadalanan simptomlar varsa, bu artıq bronxial astmadır.

- Təkrarlanan öskürəklər;

- Xışıltı-Vizing (səsli, musiqili tənəffüs);

- Nəfəsvermənin çətinləşməsi ilə gedən təngnəfəslik;

- Gecə öskürək tutmaları;

- Fiziki hərəkətlə artan öskürək tutmaları, vizing və s.

Erkən - 2-3 yaşlı uşaqlara astma diaqnozu qoymaq çətindir. Çünki bu yaşlarda respirator viruslar (bronxiolit) və bronxların quruluş xüsusiyyətlərinə görə asanlıqla vizing (musiqili xışıltı, bronxspazm) əmələ gələ bilər. Bu yaşlarda astmanı dəstəkləyəcək hər hansı laborator müayinə də yoxdur. Lakin əgər bu yaş uşaqlarda 3 dəfədən çox vizing, üstəlik ana və ya atada astma xəstəliyi varsa, uşaqda ekzema, allergik rinit varsa, süd, yumurta və ya fıstıq kimi bəzi qidalara qarşı allergik reaksiya olmuşdursa, bu əlamətlər astmanı dəstəkləyən əlamətlər hesab edilir.

Astma diaqnozu qoymaq üçün lazım olan müayinələr:

- Ağciyər rentgendə havalanma artışı;

- Yüksək İg E;

- Pozitiv Spesifik İg E;

- Dəri prik testləri;

- Tənəffüs testləri-spirometriyadır.

Pediatrın sözlərinə görə, mütləq allergen qidalar rasiondan çıxarılmalı, xüsusilə ev tozu, yun tozu, ev heyvanı tükü, tüklü oyuncaqlar astma riski olan uşaqlara verilməməlidir.

Astması olan uşaqları mümkün olduqca respirator xəstələnmələrdən qorumaq lazımdır. Bundan başqa astması olan uşağın yanında siqaret çəkilməməli, dırnaq boyası, parfüm, ev hava ətirləndiriciləri və başqa kəskin qoxularla təmasdan uzaq tutulmalıdır.

Bu xəstəliyin müalicəsində məqsəd tutmaların qarşısını almaq və astmalı uşaqların da digər uşaqlar kimi sağlam həyat tərzi yaşamalarını təmin etməkdir.