Mərkəzi Klinikanın neonatoloji reanimasiyası daha bir uğura imza atıb - Uşaq cərrahı Fuad Hüseynov     
12.04.2021 10:18

1 günlük, çəkisi 3 kq olan körpə böyük və ağır cərrahi əməliyyat keçirdikdən sonra tam sağalıb.

 

Bu barədə Mərkəzi Klinikanın uşaq cərrahiyyəsi və urologiyası uzmanı, cərrah Fuad Hüseynov sosial şəbəkədə məlumat verib:

 

“Elə doğulduğu gün ucqar rayondan valideynləri körpəni əlacsız halda Mərkəzi Klinikaya gətirdilər. Övladlarının çox ağır qüsur olan yemək borusunun anadangəlmə bağlı olması ilə dünyaya gəldiyini və belə vəziyyətdə yaşamasının mümkün olmadığını artıq bilirdilər”.

 

Həkimin sözlərinə görə, körpənin yemək borusunun yuxarı ucu kor qurtarırdı, aşağı ucu ilə də nəfəs borusu arasında yol mövcud idi (Özofagus atreziyası+Traxeoözofagial fistula). Əməliyyatla öncə nəfəs borusu ilə yemək borusu arasındakı əlaqə kəsildi, yemək borusunun yuxarı və aşağı ucları sərbəstləşdirilərək uc-uca tikildi və normal vəziyyətə gətirildi.

 

O, bildirib ki, körpə belə bir ağır əməliyyatdan sonrakı çətin günlərin öhdəsindən Mərkəzi Klinikanın peşəkar neonatoloji reanimasiyanın həkimləri sayəsində uğurla gəlib.

 

“1 həftə sonra artıq yenidoğulmuş bütün digər körpələr kimi normal şəkildə süd içə bildi və tam sağlam şəkildə evinə yola salındı”, – deyə, cərrah əlavə edib.