Onun sözlərinə görə, COVID-19 virusu insan orqanizminə daxil olduqda immun sistemi qoruyucu mexanizmləri işə salır və bunlar virusun məhv edilməsinə qarşı mübarizəyə başlayır, infeksiya prosesinin yayılmasını azaldır, virusun orqanizmdən çıxarılmasına cəhd edir. COVID-19 xəstəsi sağaldıqdan sonra onun immun sistemi zəifləmiş halda olur. Onu möhkəmləndirmək üçün ilk öncə, sağlam həyat tərzinə riayət etmək, alkoqollu içkilərdən və siqaretdən imtina etmək lazımdır.

 

Açıq havada çox gəzmək və gündəlik 7-8 saat yatmaq vacib şərtlərdəndir. Belə ki, yuxu tam olanda (yaşlı insanlar üçün bu, 6-7 saat da ola bilər) immuniteti möhəmləndirir. Qidalanmada daha çox tərəvəzdən (xüsusilə, göyərti) müxtəlif meyvə və giləmeyvələr və mütləq ədviyyatlardan (sarımsaq, sarıkök, zəncəfil, qara istiot və s.) istifadə etmək lazımdır. Bəzən COVID-19 xəstəliyindən sağalmış insanlar hesab edirlər ki, bu virusa yoluxub sağaldıqdan sonra onların bədənlərində anticisimlər yaranır və onlar daha yoluxa bilməz. Bu, tamamilə səhv fikirdir.

 

Sağalmış COVID-19 xəstələrinin heç də hamısında mükəmməl anticisimlər yaranmır və ya yaranırsa da, onların səviyyəsi zaman keçdikcə aşağı düşə bilər və pasiyent ikinci dəfə koronavirusa yoluxa bilər. Hazırda bütün dünyada, o cümlədən, Azərbaycanda da bu təhlükəli virusa qarşı hələlik bir etibarlı vasitə - vaksinasiya həyata keçirilir.

 

Bir tərəfdən gigiyenik qaydalara ciddi riayət edilməsi – qızıl qaydalar: maska, tez-tez əlləri yumaq, məsafə gözləmək, kütləvi tədbirlərdən uzaq olmaq, digər tərəfdən isə vaksinasiya COVID-19 infeksiyasına qarşı mübarizəmizin əsasını təşkil edir. Yoluxmaların və dünyasını dəyişənlərin sayının gündən-günə artmasının, dördüncü dalğanın gəlməsinin qarşısını almaq üçün bu sadə qaydalara riayət edin və peyvənd olunun ki, özünüzü və əzizlərinizi bu dəhşətli bəladan qoruyasınız.