Böyrəklər orqanizmdən artıq kalsiumu, duzları, toksinləri çıxarır, mineral balansı tənzimləyir, sidik ifrazını təmin edir. Böyrəklərin işində pozulma olan zaman o, sizin əhəmiyyət vermədiyiniz, lakin gözlə görünən siqnallar verməyə başlayır.

Son zamanlar insanların həyat tərzi onların fəaliyyətini çox tez pozur.

Aztibb.az böyrəklərinizin işində problem olduğunu göstərən siqnalları təqdim edir:

1. Yata bilməmək, narahatlıq, yuxuda tənəffüsün pozulması;

2. Ümumi zəiflik, baş ağrıları, yorğunluq. Böyrəklər orqanizmdə D vitamininin saxlanılmasını təmin edir. Böyrəklər xəstə olduqda orqanizmdə kalsium yuyulub gedir. Bu zaman beynin və əzələlərin vəziyyəti pisləşir. İnsanda güc azalması, yorğunluq, zəiflik başlayır;

3. Quru, qabıqlı, qaşınan dəri. Böyrəklər bədəndən şlak, toksin və artıq mayeni qovur. Onlar düzgün işləmədikdə bunlar qanda qalır və sümük, dəri xəstəliklərinə, qaşınmaya səbəb olur;

4. Ağızdan xoşagəlməz qoxu. Qanda toksinlərin artması ağız dadını dəyişir, iştah küsür, insan heç nədən dad almır, ağızda bakteriyalar artır, pis qoxu gəlir;

5. Təngnəfəslik. Bədəndə qalan artıq maye ağciyərlər və ətrafına yığılır, oksigen aclığı yaradır. Bu da təngnəfəsliyə səbəb olur;

6. Kürəkdə, beldə ağrı. Kişilərdə hətta qasıq, ayaqlar arasında, budlardan aşağıda da ağrı olur. Tez-tez sidiyə getmə, qarında köp, yüksək hərarət müşahidə olunur;

7. Üz, gözün üstü, ayaqlarda şiş, ödem. Artıq maye bədəndən qovulmadığı üçün bu nahiyələrdə xüsəsən axşama doğru şişkinlik yaranır.