Aztibb.az xəbər verir ki, ATU-nun Tədris Terapevtik Klinikasının həkim-hematoloqu Şəhla Şabanova bu barədə məlumat verib.

 

Həkimin sözlərinə görə, vücudumuzda 600-ə yaxın limfa düyünü var. Əsasən boyun arxası, qulaq dibi, çənə altı, körpücük sümüyü üstü və altı, qasıq, bilək, diz ətrafında, eləcə də döş qəfəsi və qarın içi limfa düyünü yerləşməsi izlənilir. Limfa düyününün böyüməsinin səbəbləri müxtəlifdir. İnfeksion, sistemik xəstəlik, depo xəstəliyi, toksik maddə təsiri nəticəsində də limfadenopatiya görülə bilər. Bundan başqa, qan xəstəliklərinin bir qismini əhatə edən limfoma və leykoz xəstəliklərində də limfa düyünü böyüməsi müşahidə edilir. Təxminən 1-1.5 sm-dan böyük olan limfa düyünü təsadüf zamanı qulaq dibi, çənə altı, boyun və ya digər nahiyələrdə ələ toxunularaq izlənilir. Əlbəttə, heç də böyümüş limfa düyünlərinin hamısının səbəbi bədxassəli qan xəstəliyi ilə əlaqəli olmur. Burada limfa düyününün yerləşməsi, ölçüsü, quruluşu, konsistensiyası, sayı önəm kəsb edir.

 

Limfaadenopatiyalı insanlarda halsızlıq, subfebril hərarət (37-38 S), səbəbsiz arıqlama, gecə tərləmələri kimi şikayətlərin varlığı soruşulur. Anamnez, müxtəlif qan analizləri və radioloji müayinələr, lazım olan halda limfa düyünü biopsiyası icra edilir.

 

Limfa düyünü böyüməsi görülən hər kəsdə həkim müayinəsinin limfoma və ya leykoz kimi hematoloji xəstəliklərin erkən mərhələdə aşkarlanması üçün vacibdir.