Yeni araşdırmalara görə, meyvə və tərəvəzdə təbii olaraq tapılan bir qrup molekul  – flavanolların qəbulu, insanları ürək xəstəliyi və tromboz kimi zehni streslə əlaqəli ürək-damar xəstəliklərindən qoruya bilər.

Aztibb.az medikforum.ru saytına istinadla xəbər verir ki, ürək və qan damarlarını əhatə edən hüceyrələrin nazik membranı effektiv endotelial funksiyası ilə periferik damar xəstəlikləri, insult, ürək xəstəliyi, diabet, böyrək çatışmazlığı, şişlərin böyüməsi, tromboz və ağır virus infeksiyaları riskini azaltmağa kömək edir. Zehni stresin qan damarlarının işinə mənfi təsir göstərə biləcəyi də məlumdur.

Böyük Britaniyanın Birmingham Universitetindən olan bir qrup tədqiqatçı kakao flavanollarının damar funksiyasındakı streslə əlaqəli dəyişikliklərə təsirini araşdıraraq əldə olunan nəticələri “Nutrients” jurnalında paylaşıblar.

Birmingham Universitetinin İdman və Reabilitasiya Məktəbinin aparıcı müəllifi, həkim Katerina Rendeiro elmi araşdırmanı belə izah edir:

“Flavanol ilə zəngin kakao içməyin zehni stresdən sonra keçici endotelial disfunksiyanı azaltmaq və stresli epizodlar zamanı qan axınını yaxşılaşdırmaq üçün təsirli bir pəhriz strategiyası ola biləcəyini gördük”.

Belə ki, tədqiqatçılar istirahətdə və stres zamanı biləkdəki qan axını və ürək-damar fəaliyyətini ölçərək stresdən sonra 90 dəqiqə qan damarlarının fəaliyyətini qiymətləndiriblər. İştirakçılar tərkibində çox miqdarda flavanol olan kakaonu içdikdə onların qan damarlarının daha az pozulduğu aşkar edilib. Tədqiqatçılar flavanolların stres zamanı qan axınını yaxşılaşdırdığını da təsbit ediblər.