"Günümüzdə körpələrə yersiz istifadə edilən kalsium siropları zəhərlidir. Xüsusilə də 1 yaşa qədər valideynlər körpəsinə kalsium siropunu verməyi sanki özlərinə borc bilirlər. Halbuki ilk yaşlarda körpələr südəmər dövrdə olduqları üçün bol miqdarda kalsium alırlar".

 

Aztibb.az xəbər verir ki, bunu tanınmış həkim-pediatr Günay Rəsulova deyib. Onun sözlərinə görə, önəmli olan körpəyə bu kalsiumun normal mübadiləsini təmin edən və mənimsənilməsinə kömək edən D vitamini damlalarını profilaktik olaraq ilk 2 il verməkdir. Yersiz, həkimlə məsləhətləşmədən istifadə edilən kalsium preparatlarının qəbulu zamanı orqanizm dərmanla gələn artıq kalsiumu ürək və beyin damarlarında depolamağa çalışır. Bu isə damarlarda kirəcləşmə, sərtləşməyə səbəb olur. Artıq istifadə edilən kalsium bağırsaqların fəaliyyətini pozur, uşaqlarda qəbizlik yaranır, böyrəklərin fəaliyyətinə toksik təsir müşahidə olunur.

 

Həkim qeyd edib ki, xüsusilə diş çıxarma dövründə kalsium siroplarının istifadəsi daha geniş yayılıb:" "Valideynlər hesab edirlər ki körpəyə kalsium verməklə onun dişinin çıxmasına yardım etmiş olacaqlar. Lakin diş çıxarma prosesinin qandakı kalsium səviyyəsi və ya miqdarı ilə heç bir asılılığı yoxdur və bu kalsium siropları diş çıxarma zamanı təsir etməyəcək. Uşaqlarda diş çıxarma prosesi genetik xarakter daşıyır. İrsi olaraq tez diş çıxardan (3 ayda) və ya normalda ilk dişlərini 1 yaşdan sonrada çıxardan uşaqlar vardır. Süd dişlərinin mayası ana bətnində 16-cı həftədə qoyulur və 3 yaşında tamamlanır. Hec bir vasitə ilə bu prosesə təsir edə bilmərik".

 

G.Rəsulova əlavə edib ki, uşağın Raxit keçirdiyinə dair şübhələr olduqda qan analizi ilə bu öz təsdiqini taparsa (qanda ionizə kalsium seviyyəsi aşağıdırsa) o zaman həkim məsləhəti ilə həkimin təyin etdiyi müddət ərzində kalsium preparatlarından istifadə edilə bilər.