Bir qrup braziliyalı alim COVID-19-a yoluxma nəticəsində ölmüş bəzi pasiyentlərin diş ətlərində yeni tipli koronavirus olmasını aşkar edib.

Aztibb.az xəbər verir ki, San-Paulo Universitetinin (USP) Tibb fakültəsinin apardığı tədqiqatın nəticələri “Journal of Oral Microbiology” elmi jurnalında dərc edilib.

Tədqiqatının müəlliflərindən biri olan Bruno Matukun sözlərinə görə, parodont toxumalarında SARS-CoV-2 olması yoluxmuş pasiyentlərin tüpürcəyində bu virusun mövcudluğuna imkan yaradan amillərdən biri ola bilər. Diş əti toxumalarında daha əvvəl başqa viruslar, məsələn herpes, Epşteyn-Barr virusu və sitomeqalovirus aşkar edilib.

Braziliyalı alimlər belə bir fərziyyə irəli sürüblər ki, başqa respirator patogenlərlə müqayisədə, yoluxma səviyyəsi daha yüksək olan yeni koronavirus ağız boşluğunda və beləliklə, tüpürcəkdə yarana bilər. Alimlər əmindirlər ki, parodont toxuması SARS-CoV-2 üçün hədəfdir. Diş ətində COVID-19 virusunun aşkar edilməsi həm də onu təsdiq edir ki, bu toxumanın şişməsi (periodontit) koronavirusla bağlı vəziyyətin ağırlaşması riskini artırır.