Fitoterapevtdən müxtəlif xəstəliklər üçün faydalı RESEPTLƏR

Fitoterapevtdən müxtəlif xəstəliklər üçün faydalı RESEPTLƏR

26.03.2021 13:02

Tanınmış həkim-fitoterapevt Fizuli Hüseynov müxtəlif xəstəliklər zamanı faydalı ola biləcək resepetlər barədə sosial şəbəkədə paylaşım edib.

Aztibb.az həmin reseptləri təqdim edir:

Təzə zəncəfili ət maşından keçirib bərabər miqdarda qoyun quyruğu ilə qarışdırıb onurğa və ya dizə qoyduqda yumşaldıcı təsir göstərir.

Çilədağı ilə qoyun quyruğunu bərabər miqdarda ət maşından keçirib oynaq üzərinə qoyub bağladıqda sərtləşmiş oynağı və bağları yumşaldır, sümükləri elastikləşdirir. Çilədağı və quyruq qarışımı allergik reaksiya göstərmədiyi təqdirdə 2 gün ərzində oynaq üzərində saxlamaq mümkündür.

Biyan kökü dəmləməsinin içilməsi skaliozların müalicəsində yanaşı tətbiq olunduqda böyük effekt verir. Skaliozların üzərinə çilədağı ilə qoyun quyruğunun birlikdə çəkilmiş qarışımı qoyduqda isə onurğa elastikləşir və müalicəyə daha tez tabe olur.

3 kq yağsız sümüyü 6 litr suda 14 -15 saat zəif odda qaynatdıqdan sonra süzüb, üzərinə yığılmış yağı atdıqdan sonra suyunu plastmas şüşəyə tökün, soyuducunun buzluq gözünə qoyun və gündə 2 stəkan için. Bu qarışım sümükləri möhkəmləndirir, onurğa ağrılarını azaldır, bağırsaqları yumşaldır, bağırsaqdaxili çatları aradan qaldırır.

Onurğa və oynaq üzərinə əvvəlcə hicama etdirin, 3 gün sonra yenidən etdirin (məsələn hər dəfə 5 banka) sonra həftədə 6 ədəd, cəmi 42 vəya 48 ədəd zəli qoydurun. Bu, osteoxondroz və artrozlarda olduqca faydalıdır.

100 qram ozonlaşmış qara zirə yağına 1 dolu çay qaşığı qırmızı pul bibər tozu qarışdırıb 2 gün evdə istilik sistemi üzərində saxlayın. Bu yağdan gündə 2 dəfə onurğa və ya oynaqlara çəkib 5 dəq masaj edin. Bunun ağrıkəsici və yumşaldıcı təsiri var.

3 stəkan suya bir xörək qaşığı gicitkən yarpağı və bir xörək qaşığı qarğıdalı saçağı qarışdırıb 5 dəqiqə qaynadın. Bu çay gündə 3 dəfə yeməkdən əvvəl 1 stəkan içildikdə poliartrit və revmatizma ağrılarını azaldır. Eyni qaydada gilas saplağı və qatırquyruğu otunu dəmləyib gündə 3 dəfə yeməkdən 30 dəqiqə əvvəl 1 stəkan içmək olar.

300 qram sarıkök tozu və 100 qram zəncəfil tozunu bir-birinə qarışdırın, gündə üç dəfə, yeməkdən əvvəl bir çay qaşığı ağıza atıb üstdən bir stəkan su için, uzun müddətli oynaq ağrılarında və ayaq ağrılarında faydalıdır.