Sağlam orqanizm üçün təmiz dəri əsas şərtdir - Pediatr uşaqların çimizdirilmə qaydasından danışdı - aztibb.az AZƏRBAYCANIN SƏHİYYƏ XƏBƏR PORTALI

Sağlam orqanizm üçün təmiz dəri əsas şərtdir - Pediatr uşaqların çimizdirilmə qaydasından danışdı

26.03.2021 11:07

Hər bez dəyişimində bez bölgəsi yaxşıca yuyulub-qurudulursa, uşağı tez-tez çimizdirməyə ehtiyac yoxdur. Körpələrdə bezi dəyişdirərkən səyahətdə deyilsinizsə, nəm salfetlərdən istifadə etməməyə çalışın, ehtiyac olarsa, pambığı adi su ilə isladıb silmək olar.

Aztibb.az xəbər verir ki, pediatr Günay Rəsulova sosial şəbəkədə körpənin çimizdirilməsi haqqında tez-tez verilən sualları cavablandırarkən belə deyib.

O, bildirib ki, 1 yaşa qədər uşağı həftədə 3 dəfə çimizdirmək kifayət edir (tez-tez çimizdirmək dərini quruda bilər). Çimizdirdikdən sonra dərinin qurumaması üçün körpənin bədəninə hipoallergik nəmləndirici krem çəkmək lazımdır. Vannanın içərisində uşağın başı daha hündürdə yerləşməlidir. Əvvəlcə ayaqlardan başa doğru çimizdirmək, bədəni yuduqdan sonra ən axırda başı öndən arxaya yuyub uşağı sudan çıxarmaq lazımdır.

Uşağın çimdiyi suyun temperaturu 37 dərəcədən isti və ya soyuq olmamalıdır. Buna su termometrləri ilə nəzarət etmək olar. Göbəkbağı düşənə qədər, göbək quruluğunu qorumaq üçün uşağın bədənini nəm əskiylə silmək olar. Lakin HİV, Hepatit B və C ilə doğulan uşaqların bədəni göbək düşənə qədər çimizdirilərək yuyulmalıdır.

Həkimin sözlərinə görə, körpələrin bədəni soyumağa tez meylli olduğu üçün ilk 1-2 çimizdirmə qısa davam etməlidir. Uşaq çimən ilk saatlarda otağın temperaturu normadan 2-3 dərəcə artıq olmalıdır. Körpənin sudan qorxmaması və çimizdirmə prosesini sevməsi üçün suyun temperaturu düzgün tənzimlənməli, su uşağın bədəninə əvvəlcədən hazırlanmış su qabı ilə tökülməlidir.

"Unutmayaq ki, sağlam orqanizm üçün sağlam və təmiz dəri əsas şərtdir. Körpələri həftədə ən az 2-3 dəfədən az çimizdirmək, dəridə tər səpgiləri, bişməcə, qaşınma, qoxu kimi xoşagəlməz hallara səbəb ola və körpənin yuxusuna, qidalanmasına, əhval ruhiyyəsinə də mənfi təsir göstərə bilər", deyə - Pediatr əlavə edib.