Halsızlıq və immun zəifliyini aradan qaldırmaq üçün - Badamlı, çiçək tozu tərkibli ballı qarışım - aztibb.az AZƏRBAYCANIN SƏHİYYƏ XƏBƏR PORTALI

Halsızlıq və immun zəifliyini aradan qaldırmaq üçün - Badamlı, çiçək tozu tərkibli ballı qarışım

25.03.2021 10:57

İnsanlar ilk növbədə düzgün qidalanmalıdırlar. Çünki belə olduqda nə bitki, nə də dərman preparatlarıyla müalicəyə ehtiyac qalmaz. Elə məcunlar vardır ki, onları gündəlik qida rasionumuza əlavə etsək faydasını görərik. Məsələn, hər hansı yağlı, qlütenli xəmir məmulatlarındansa, şirniyyata olan aludəçiliyimizi və ya tələbatımızı badamlı, polenli bal qarışımı ilə ödəmiş olarıq.

Aztibb.az xəbər verir ki, bunu həkim-fitoterapevt Fizuli Hüseynov deyib.

O, bildirib ki, badam uşaqların sümük – əzələ, yəni dayaq-hərəkət sisteminin inkişafı üçün lazımlı qidadır. Görməni itiləşdirir, beynin fəaliyyətini artırır. Badam omeqa-3 qaynağıdır. Bu qida yaşlılar üçün də çox faydalı nemətdir. Tərkibindəki kalsium sümük əriməsinin, maqnezium isə baş ağrısı, əzələ ağrıları, yuxusuzluq, yorğunluq, baş gicəllənməsinin qarşısını alır. Badamdakı yağlar xolesterini azaldır, immuniteti gücləndirir. Böyümə, inkişaf dövründəki uşaqlar və həmçinin hamiləlik vaxtı lazım olan vitaminlərlə zəngin olan badam, dad və iybilmə qabiliyyətini artırır. Məcuna əlavə olunan polen, yəni çiçək tozu arı məhsulu olaraq, vitamin və mikroelementlərlə olduqca zəngin vasitədir. Vitamin B1, B2, B3, B5, B6, C, A, E vitaminləri qaynağıdır. Hamilələrin istifadə edə biləcəyi məhsuldur. Zəngin aminturşu qaynağıdır.

Bal isə çox gözəl daşıyıcıdır. Bala qarışdırılan məhsulların tərkibi onun köməyi ilə bağırsaqlardan daha tez qana sorulur və toxumalara çatdırılır. Bal özü zəif allergik təsirli olsa da, allergiyalı xəstələr balla müalicə oluna bilir. Həmin xəstələrə çox az miqdarda bal verməklə onlar balın qəbuluna alışdırılır. Çox az miqdarda balı yeməkdən başlayaraq dozanı yavaş yavaş artıraraq, normal həddə qədər çatdırmaq lazımdır. Bu proses bəzən iki-üç ay çəkə bilər.

Həm bal, həm çiçək tozcuqları, həm də badam orqanizmdə immun sistemini bərpa etməklə yanaşı amin turşu istehsalını artırır.

Hazırlanması qaydası

Badam 150 qram

Çiçək tozu 50 qram

Bal 1 kq

Əvvəlcə badam, sonra çiçək tozu qəhvəüyüdəndə üyüdülür, sonra hamısı birlikdə bal ilə qarışdırılır. Bu məcunu böyük adamlar gündə üç dəfə yeməkdən 30 dəqiqə əvvəl bir-iki çay qaşığı yeməlidir. 10 yaşa qədər uşaqlar gündə üç dəfə yeməkdən əvvəl bir çay qaşığı, 10 yaşdan kiçik uşaqlar isə gündə üç dəfə yeməkdən 30 dəqiqə əvvəl yarım çay qaşığı yeyə bilərlər. Bu məcun həm də dadlı bir səhər yeməyidir, səhərlər kəpəkli çörəyin üstünə kərə yağı ilə birlikdə çəkərək yemək mümükndür. Təzyiqi yüksək olanlar, şəkər xəstələri və məcuna fərdi allergiyası olanlar ehtiyatlı davranmalıdır.