Bir çoxumuzu bu suallar düşündürür: Vaksinasiyadan sonra nə dərəcədə immunitet yaranır? Anticisimləri hansı yolla və nə zaman yoxlaya bilərik? İmmunizasiyadan sonra özümüzü yenə də qorumalıyıqmı?

 

Aztibb.az xəbər verir ki, Mərkəzi Gömrük Hospitalının terapevt həkimi Xumar Novruzovanın sözlərinə görə, bu kimi aktual sualların cavabları bəzən bir-birini təkzib edir. Çünki SARS-COV-2 virusu hələ yenidir və onun öyrənilməsinə yönəlmiş tədqiqatlar davam etməkdədir. Vaksin alan şəxslərdə vaksinasiyadan 21-28 gün sonra qanda anticisimlərin səviyyəsi yoxlanıla bilər.

 

COVID-19 xəstəliyinin diaqnostikası üçün SARS-COV-2 Viral nuklear testi (nucleic acid amplification or antigen tests) verildiyi halda, vaksinasiyadan sonra ANTİ SARS-COV-2 SPİKE protein (İgM/İgG) yoxlanılmalıdır. Analizin verilməsi qaydası belədir: vaksinasiyanin ikinci dozasından sonra 21-28 gün keçməli, həmin gün analizdən 2-3 saat öncə qida və su qəbulu dayandırılmalı və azı 30 dəqiqə əvvəl siqaret çəkilməməlidir.

 

Bəs immunizasiyadan sonra özümüzü yenə də qorumalıyıqmı? Bu suala birmənalı şəkildə "Bəli" deyə cavab veririk. Sosial məsafə, gigiyena qaydaları və maskadan istifadə hələ də aktual olaraq qalır.