İllər öncə Mərkəzi Klinikaya vaxtından əvvəl - 29 həftəsində doğulmuş bir körpə transfer olunmuşdu. Olduqca ağır patologiyalar - ciddi sepsis, bağırsaq keçməzliyi, geniş PDA, tənəffüs, ürək yetməzliyi körpənin həyatını təhlükəyə atırdı.

Aztibb.az xəbər verir ki, bu barədə Mərkəzi Klinika “Facebook” sosial şəbəkəsində məlumat paylaşıb.

Məlumatda bildirilib ki, belə bir kompleks xəstənin məsuliyyətini öz üzərinə götürmək, poliorqan yetməzlikləri korreksiya edib, xəstəni əməliyyata hazırlamaq, körpə üzərində iki çox ağır əməliyyatı (bağırsaq keçməzliyi və geniş PDA-nın ləğvi) icra etmək və sonrakı dövrdə yenidoğulmuşu neonatal reanimasiya şəraitində uzun müddət izləyərək fəsadsız evə yazmaq Mərkəzi Klinika kollektivinin gücləndirilmiş rejimdə fəaliyyətinin nəticəsi idi:

“Körpənin sağlamlığına qovuşması və bu gün həyatını tam normal şəkildə davam etdirməsi Pediatriya şöbəsinin müdiri, tibb üzrə fəlsəfə doktoru, həkim-neonatoloq Sevda Əsədova başda olmaqla peşəkar həkim və tibb bacıları heyətindən ibarət olan Pediatriya şöbəsi - Neonatalogiya və Reanimasiya bölməsi, Uşaq kardiologiya və Uşaq nevrologiya bölməsi, Əməliyyatxana və Anesteziologiya şöbəsi, Şüa Diaqnostika və Tibbi laboratoriya şöbəsinin 7/24 dəqiqliklə fəaliyyət göstərməsinin nəticəsidir”.

Bildirilib ki, bu nailiyyətin əldə olunmasında Ürək-damar cərrahiyyəsi şöbəsi, Uşaq cərrahiyyəsi, Oftalmologiya və Qulaq, Burun, Boğaz xəstəlikləri bölməsinin də danılmaz rolu olub.

“Mərkəzi Klinika kollektivi adından artıq doğmamıza çevrilmiş balamıza bundan sonrakı həyatında sağlam və möhkəm ömür diləyirik”, - deyə məlumatda qeyd olunub.