İraqda yaşayan dünyaca tanınmış azərbaycanlı professor, travmatoloq-ortoped Hüseynəli İsmayılov Vətən müharibəsində yaralanmış igid oğullara xidmət göstərmək üçün ölkəmizə gəlmişdi.

Aztibb.az xəbər verir ki, professor ölkəmizdə olan müddətdə Vətən müharibəsində ağır yaralanan bir neçə qazını müayinə edib. Müayinə nəticəsində onlarda daha çox sinir və sümük problemləri aşkarlanıb. O, ölkə rəhbərliyinə müraciət edərək hər zaman qazilərimizin müayinə, müalicə və əməliyyatında əlindən gələni etməyə hazır olduğunu bildirib.

Professor vətəndaşların müraciətlərinin də çox olduğunu deyib: “Budəfəki gəlişim zamanı da xeyli müraciət var idi. Müraciətlərin çoxu əvvəllər müalicə almış fəsadlı xəstələrlə bağlı olur. Sümük qüsurları, pəncə-əl əyrilikləri ilə bağlı müraciətlər daha çox qeydə alınır. Hər zaman bildirmişəm ki, mən həmişə öz xalqıma xidmət etməyə hazıram”.

Qeyd edək ki, məşhur azərbaycanlı professor, dünyada boyuzatma rekordunun sahibidir. O, hazırda Yaxın Şərqdə akademik İlizarov adına Rusiya Travmatologiya və Ortopediya Mərkəzinin rəhbəridir. Həmyerlimiz 2003-cü ildə Rusiya Prezidenti Vladimir Putin tərəfindən “Rusiyanın əməkdar səmərələşdiricisi” adına layiq görülüb. O, dünya ortopediya və travmatologiya tarixində ilk dəfə olaraq əl və pəncə patologiyasının İlizarov və onun təkmilləşmələri üsulu ilə müalicə prinsiplərinin konsepsiyasını tərtib edərək elmi əsasını hazırlayıb. Təsadüfi deyil ki, ona “İkinci İlizarov” adı verilib.