Dünyaya yenicə göz açmış körpə vəziyyəti çox ağır olduğu üçün doğulduğu klinikada süni tənəffüs aparatına bağlanmışdır. Yenidoğulmuş biri ürək əməliyyatı olmaqla, iki böyük ağır cərrahi əməliyyat keçirmişdir.
Bu barədə Mərkəzi Klinikanın uşaq cərrahiyyəsi və urologiyası uzmanı, cərrah Fuad Hüseynov məlumat verib.
Həkim bildirib ki, həyatla ölüm arasında mübarizə aparan körpəni dünyaya göz açar-açmaz bu vəziyyətə salan səbəb olduqca ağır ölümcül patologiya olan, döş qəfəsini qarın boşluğundan ayıran təbəqənin olmaması idi (diafraqmal yırtıq):
“Nəticədə, bağırsaqlar, dalaq və mədə döş qəfəsinə keçərək ağciyəri, ürəyi sıxıb onun inkişafı və fəaliyyətinə mane olurdu. Uşağın vəziyyəti çox ağır olduğu üçün doğulduğu gün əməliyyat etmək mümkün olmadı.
Neonotoloqlar və kardioloqlarımızın gərgin səylərindən sonra körpənin vəziyyəti çox riskli olsa da cərrahi əməliyyata imkan verəcək hala gəlmişdir.
Çəkisi 2500 qram olan 1 günlük körpə cərrahi əməliyyata alınmış, bağırsaqlar, mədə və dalağın döş qəfəsində olduğu müəyyən edilmişdir.
Əməliyyat uğurlu keçmiş, bütün orqanlar qarın boşluğuna qaytarılaraq diafraqmadakı açıqlıq bərpa edilmişdir.
Əməliyyatdan sonra hər şey yolunda getsə də, körpənin ürəyində olan qüsura bağlı olaraq onu süni tənəffüs aparatından ayırmaq mümkün olmurdu. Bu səbəbdən 1 həftə içində 2-ci əməliyyat qərarı verildi. Ürək-damar cərrahı, tibb elmləri doktoru, professor Kamran Musayev tərəfindən PDA-nın ləğvi əməliyyatı uğurla həyata keçirildi”.
Həkim körpənin artıq evə yazıldığını və normal uşaqlar kimi həyatına davam etdiyini deyib.