Göyərtilərin düzgün təmizlənməsi insan sağlamlığı baxımından çox əhəmiyyətlidir. Rusiyada ötən il tədqiq edilmiş sınaq nümunələrinin 2,2%-i mikrobioloji göstəricilər üzrə tələblərə cavab verməyib.

Aztibb.az meddaily.ru-ya istinadən xəbər verir ki, Rusiyanın Moskva ərazisi üzrə "Роспотребнадзор" İdarəsinin Qidalanma gigiyenasına nəzarət şöbəsinin rəisi Nadejda Raevanın sözlərinə görə, bu, əsasən fərdi qablaşdırmalarda saxlanılan və qəbul edilən doğranmış göyərtilərə aiddir. Tez-tez onu sadəcə paketdən çıxarıb istifadə edirlər, lakin biz göyərtini ev şəraitində əlavə emala məruz qoymağı - axar suda yumağı məsləhət görürük.

Şöbə rəisi qeyd edib ki, əgər göyərtini uşağa veririksə, onun üzərinə qaynar su tökmək məsləhət görülür: "Göyərtiləri mövcud ola biləcək zəhərli elementlərdən təmizləmək üçün onu duzlu və ya sirkəli suda saxlamaq arzuolunandır. Bir litr suya bir xörək qaşığı duz və ya sirkə əlavə edilir. Məhlulla isladılma zamanı göyərtilər nitratdan 30% qədər təmizlənir. Bundan başqa, helmint parazitlərinin yumurtaları suyun üzərinə çıxırlar". 

Qeyd edək ki, diyetoloqlar hər gün 100-150 qram göyərti qəbul etməyi məsləhət görürlər.