Həkimin sözlərinə görə, epilepsiya müalicəsi alan qadınlar daha erkən yaşda menopauzaya girə bilirlər. Hormonlara qarşı çox həssas olan tutmalar zamanı müvafiq hormon müalicəsi təyin etdikdə yaxşı təsir edir. Epilepsiya xəstəsi olan qadınların hamiləliyi riskli hesab edilir. Bununla bərabər, epileptik hamilələrin çoxunda nə hamiləlikdə, nə də doğuşda hər hansı bir problem olmur:

 

"Hamiləliyin planlanması ilə bu dövrdəki risklərin mümkün olduğu qədər azaldılması və epilepsiya tutmalarının kontrol altına alınması həyata keçirilə bilər. Hamiləlik zamanı tutma sıxlığının artması, epilepsiya müalicəsinin dölə təsiri və hamiləlik zamanı ortaya çıxacaq problemlər yaxından təqib edilməlidir. Hamilə qalmadan 1-3 ay öncə xəstəyə 4-5 mq fol turşusu təyin edilməli və ən azı 12 həftə qəbulu davam etdirilməlidir".

 

O, bildirib ki, epilepsiya xəstəsi olan qadınları narahat edən suallardan biri hamiləlik zamanı istifadə olunan epilepsiya əleyhinə müalicənin dölə təsirinin olub-olmamasıdır. Epilepsiya əleyhinə müalicənin döldə anormallıq yaratma kimi yan təsiri vardır. Tutmalar həm anada, həm də döldə hipoksiyaya (oksigensizliyə) səbəb olduğundan risklidir. Digər bir məsələ epilepsiya üçün istifadə olunan dərmanların dozası və sayıdır.

 

Hamiləlik dövründə istifadə olunan dərmanın dozası artırılarsa, doğuşdan sonra intoksikasiya yaranmaması üçün doza azaldılmalıdır. Əgər xəstə hamilə qaldıqdan sonra müraciət edirsə, müalicə dəyişdirilməməli və kəsilməməlidir. Doğuşa gəldikdə isə, epileptik hamilə qadın həm təbii yolla, həm də kesar əməliyyatı ilə uşaq dünyaya gətirə bilər.

 

Epilepsiya əleyhinə dərmanların çoxu ana südünə keçir. Lakin bu dərmanların miqdarı az olduğundan, heç bir problem olmadan ana uşağı əmizdirə bilər. Beləliklə, epileptik qadın xəstəyə müalicəyə başlarkən bu nüanslara mütləq diqqət edilməlidir".