Varikoz ümumi anlayışdır, bəzi insanlarda kapilyar, digərlərində isə damar genişlənməsi formasında rast gəlinir. 

Bu barədə ürək-damar cərrahiyyə uzmanı, həkim Cabir Gülmalıyev sosial şəbəkədə məlumat verib.

Həkimin sözlərinə görə, kapilyarların müalicəsi daha çox estetik xarakter daşıyır və insanların istəyinə bağlı olur. Damarların genişlənməsi isə əksinə, müalicə olunmadıqda ciddi fəsadlara yol aça bilir:

“Hər iki halda müalicə mütləqdir və gecikdirilməməlidir. Varikoz genişlənmiş damarlar müalicəsiz qalarsa, xəstədə amputasiya riski yarana bilər”.

Cərrahın sözlərinə görə, damar çatışmazlığının ağırlaşmış mərhələlərində ayaqlarda venoz və trofik yaralar, ağciyər arteriyasının tromboembolizmi və s. yarana bilər. İnfeksiyalı yaraların müalicəsi gecikərsə, yaxud müalicə edilməzsə, xəstələrdə proses daha da irəliləyər. Nəticədə, ayaq müxtəlif hissələrdən kəsilə bilər.