Dəriyə qulluq dərinin qorunması və möhkəmləndirilməsi üçün edilən prosedurlar kompleksidir.
Aztibb.az dərini təravətləndirməyin üsullarını təqdim edir.
Dərinizin hamar görmək istəyirsinizsə bananlı qidalandırıcı maska çəkin. Orta ölçüdə 1 bananı əzib üzərinə 1 çay qaşığı qidalandırıcı krem, 1 çay qaşığı zeytun yağı, yarım çay qaşığı limon suyu əlavə edib qarışdırın. Qarışığı üzünüzə sürtüb 15-20 dəqiqə saxladıqdan sonra yuyun.
Göz altında olan sallanmış dəridən xilas olmaq üçün soyulmuş kartofu sürtkəcdən keçirib gözə və alına qoyun, 20 dəqiqidən sonra həmin hissənın təravətləndiyini görəcəksiniz.
Göz altındakı göyərmədən xilas olmaq üçün isə qara və yaşıl çayı qarışdıraraq dəmləyib, soyuduqdan sonra gözün altına kompress qoymaq lazımdır. 15-20 dəqiqədən sonra onları götürüb, süddə islanmış pambığı həmin hissəyə qoyaraq 15 dəqiqə gözləmək lazımdır.
Qıcıqlanmış dərini sakitləşdirmək, üzün dərisindən yorğunluğu götürmək üçün kefir maskasından istifadə edin. 100-200 qr yağlı kefiri 20 dəqiqə müddətində bir neçə dəfə üzünüzə sürtüb silin. Sonda ilıq su ilə yuyun.
Dərinizin tonusunu qaldırmaq istəyirsinizsə yumurtanın ağına zeytun yağı və bir neçə damcı limon suyu töküb üzünüzə çəkin. Bu maska yağlı dəri üçündür.
Quru dərini tonuslandırmaq üçün isə kəsmiyi və ya xamanı qaymaqla qarışdırıb dəriyə çəkmək olar.
Normal dərini tonuslandırmaq üçün bananla qreypfrutun şirəsini qarışdırıb üzə sürtmək lazımdır.
Üzün dərisindən solğunluğu götürmək üçün sizə meyvə və tərəvəzlərdən hazırlanmış qidalandırıcı maskalar kömək edəcək.
Quru dəri üçün, iki orta ölçülü yerkökünü sürtgəcdən keçirib, yumurta sarısı ilə qarışdırıb 10-15 dəqiqə üzdə saxlayıb, sonra yumaq lazımdır. Normal dərisi olanlar yumurta ağını üzün dərisinə çəkib, 10-15 dəqiqədən sonra isti su ilə yumalıdır.
Əgər dərinizə həddən artıq yağlanma varsa və bu makyaj etdikdə dərini parlaq göstərirsə kosmetoloqun bir neçə məsləhəti bu məsələdə sizə yardımçı olacaq. Bir banka suya bir neçə damcı sirkə qatıb pambıqla silmək lazımdır. Sirkə üzdəki yağları aparır, masamələrdəki çirkləri təmizləyir. Bu proseduru gecə makiyajından sonra etmək daha məqsədəuyğundur.
Yanağınızı çəhrayılaşdırmaq istəyirsinizsə, çiyələk və çobanyastığı qarışığını soyuducuda dondurmaq lazımdır. Sonra həmin buz parçası ilə üz silinməlidir. Buzu bir yerdə iki saniyədən artıq saxlamaq olmaz.
