Erkən klimaks estrogen çatışmazlığı nəticəsində yaranan və aybaşının erkən və yaxud vaxtından əvvəl kəsilməsi ilə müşayiət olunan dəyişikliklər kompleksidir.

Aztibb.az xəbər verir ki  bu barədə mama-ginekoloq Təravət Məmmədova məlumat verib.

Həkim vurğulayıb ki, erkən 45 yaş, vaxtından əvvəl deyildikdə isə 40 yaş nəzərdə tutulur.

Onun sözlərinə görə, ağırlaşmış irsiyyət, travma, yumurtalıqların iltihabı və törəmələri, onların xaric edilməsi, funksiyasının medikamentoz və ya toksiki yolla sönməsi cavan yaşlarda qadın cinsi hormonlarının səviyyəsinin azalmasına səbəb olur.

T.Məmmədova qeyd edib ki, erkən klimakterik dövr vazomotor, emosional və metabolik-trofik pozğunluqlarla təzahür edə bilər.

"Diaqnoz tipik şikayətlərə və laborator yolla estrogenlərin azalmasının təsdiqinə əsasən qoyulur. Başlıca müalicə üsulu əvəzedici hormonoterapiyadır", - deyə mama-ginekoloq bildirib.