Bətndaxili dövrdə uşaq amniotik qişadakı mayedə üzür. Hər hansı təsir nəticəsində (iltihab, uğursuz hamiləlik və s.) amniotik qişa zədələnir. Amnion qişa uşağın başına, ayağına, qoluna və bütün orqanlarına dolana bilər. Yaranan amniotik band dölün toxumalarını əhatə edir və təzyiq göstərir. Nəticədə, sıxılmış hissədən aşağı nahiyyəyə qan və oksigen axını pozulur. Əvvəlcə yüngül ödem yaranır və sonra isə həmin üzvün inkişafdan qalması, ağır hallarda qopması baş verir. Uşağın orqanlarına dolandıqda amnion zar əl və ayaqda inkişaf pozğunluğuna səbəb olur. Yumru ayaq, əl və ayaqların yetərsiz böyüməsi, pərdəli barmaqlar, yarıqdodaq kimi inkişaf qüsurları yarana bilər.

Pediatr-neanotoloq Nurəngiz Hacıyeva sosial şəbəkədə amniotik bant sindromu adlı qüsur haqqında məlumat paylaşıb.

Həkim bildirib ki, bu xəstəliyin diaqnozu bətn daxilində USM-ə əsasən təyin edilir. Əgər amniotik band dölün həyati vacib orqanlarına dolanıb onu sıxarsa, (baş, boyun, göbək ciyəsi) hamiləlik dayandırılmalıdır. 

"Ətraflarda yaranan fəsadlar, uşaq travmatoloqu tərəfindən mərhələli əməliyyat nəticəsində müəyyən qədər düzələ bilir", - deyə pediatr əlavə edib.