Uşaqların orqanizmi həssas olduğu üçün onlar böyüklərə nisbətən allergik xəstəliklərə daha çox meyilli olurlar. Bu isə özünü ən çox yaz aylarında göstərir. Uşaqlarda ən çox hansı allergik xəstəliklərə rast gəlinir? Aztibb.az həmin xəstəlikləri təqdim edir:

Allergik bronxit - Azyaşlılarda tez-tez rast gəlinən allergik xəstəlikdir. Bəzi allergiyaların ağırlaşmaları zamanı bronxların iltihablaşması ilə müşayiət olunur.

Allergik rinit - Bu xətəliyə ən çox yaz aylarında rast gəlinir. Çiçək tozcuqlarının, havada olan tozların, tüklü oyuncaqların burunu qıcıqlandırması nəticəsində əmələ gəlir.

Qida allergiyası - Adətən körpə yaşlarından müxtəlif qida vasitələrinə qarşı olan allergik xəstəlikdir. Xəstəlik özünü dəridə qızartılarla büruzə verir.

Allergik dermatit - Körpələrin inək südü ilə qidalandıqları zaman ortaya çıxır. Özünü üzdə, ağız ətrafında və boyunda olan qızartılarla göstərir.

Dərman allergiyası - İmmun sistemi möhkəmlənməmiş və genində dərmanlara qarşı həssaslıq olan uşaqlarda müşahidə edilir.

Heyvanlara qarşı allergiya - Heyvanları sığallayarkən və ya toxunarkən əllərdə və üzdə səpgilərlə özünü büruzə verir.

Həşəratlara qarşı allergiya - Həşərat sancması zamanı baş verir.

Anafilaktik şok - Bəzi uşaqlarda antibiotiklərə qarşı olan allergiya zamanı, məlumatsızlıqdan antibiotik qəbulu zamanı olur. Bəzən arı sancması nəticəsində də baş verə bilər. Vaxtında və düzgün müdaxilə olunmadıqda ölümlə nəticələnir.