Artıq çəkidən qurtulmaq istəyən şəxslər bir çox hallarda çəki azaltmaq üçün yalnış yollar seçirlər. Bunlardan biri də diuretik, yəni sidikqovucu preparatlardan istifadə etməkdir. Həkim təyinatı olmadan sidikqovucu istifadə etməklə çəki atmaq əslində yavaşladılmış intihar deməkdir.

Bu barədə nefroloq-hekim Taleh Nağdalıyev sosial şəbəkədə etdiyi paylaşımda bildirib.

O, bildirib ki, diuretiklərin uzun müddət istifadə olunması mineral mübadilə pozulmasından (hipokalemiya, hipofosfatemiya, hiponatremiya və s.) tutmuş kəskin və xroniki böyrək çatışmazlığına, ürəkdə ritm pozulmasına qədər ciddi fəsadlar törədə bilər. Səbəbi bilinməyən kalium azlığı və metabolik alkaloz zamanı diuretik asılılığından şübhələnmək olar:

“Ən dəqiq müayinə sidikdə diuretik axtarılmasıdır. Müalicədə ilk növbədə diuretik qəbulu dayandırılmalı, daha sonra fəsadlar aradan qaldırılmalıdır. Həkim məsləhəti olmadan pəhriz çox təhlükəlidir”.