Alimlər Alzheymer xəstəliyindən xilas yolunu tapıblar - Mühüm kəşf
23.02.2021 15:00

Rusiya Elmlər Akademiyasının Sitologiya İnstitutu Alzheymer xəstəliyi fonunda neyronların məhv olmasından xilas edən vasitəni sınaqdan keçirib.

 

Aztibb.az meddaily.ru-ya istinadən xəbər verir ki, gəmiricilər üzərində aparılan sınaqlar göstərib ki, hidrokortizon törəməsi yaddaşın itməsini azaldır. İnstitutun Hüceyrələrin qoruyucu mexanizmləri laboratoriyasının böyük elmi işçisi Vladimir Lazarev bildirib: "Bu maddənin hətta aşağı konsentrasiyalarda istifadəsi beyin hüceyrələrini məhv edən zülal komplekslərinin yaranmasına mane olur. Bu halda preparat hüceyrələrin həyat fəaliyyəti üçün lazım olan zülalların normal funksiyalarına təsir etmir".

 

Tədqiqat zamanı dünyada ilk dəfə sübut edilib ki, Alzheymer xəstəliyi zamanı neyronların məhv olması prosesində QAFD (qliseraldehid fosfat dehidrogenaz) zülalı aktiv iştirak edir. Bu zülal son dərəcə zəhərli kompleksləri formalaşdıraraq beta-amiloidlə qarşılıqlı əlaqədə olur.

 

"Biz bu komplekslərin formalaşması mexanizmini müəyyən etməyi və onların yaranmasına mane olan preparat əldə etməyə müvəffəq olduq. Artıq Alzheymer xəstəliyinin müalicəsi üçün hidrokortizon törəmələrinin tətbiqi üzrə patentin qeydiyyatı üçün müraciət olunub", - deyə institutun tədqiqatçısı bildirib.