Artroz dayaq-hərəkət aparatının ən çox yayılmış patologiyasıdır. Statistik göstəricilərə əsasən, dünya əhalisinin 80% -i bu və ya digər dərəcədə artrozdan əziyyət çəkir. Bu xəstəlik oynağın tədricən dağılması, həmçinin, oynaqətrafı nahiyədə arzuolunmaz proseslərin getməsi, oynaq qığırdağının degenerativ-distrofikdəyişiklikləri ilə xarakterizə olunur.

Artroz ağrı, çox hərəkət zamanı ağrıların artması və hərəkət məhdudluğu ilə təzahür edir. Simptomlar tədricən artır, lakin xəstəliyin inkişaf sürəti müxtəlif ola bilər. Yaş artdıqca xəstəliyin yaranma və inkişaf ehtimalı da yüksəlir.

Artrozun 4 əsas simptomu var, bunlar:

1. Ağrı:1-ci mərhələdə zədəli oynaqlarda hərəkət zamanı ağrı (xəstəliyin lap əvvəlində çox da nəzərə çarpmır ki, bu da xəstəliyi diqqətdən yayındırır), 2-ci mərhələdə ağrı oynaqlara cüzi yüklənmə zamanı yaranır, 3c-ü məehələdə isə hətta, sakit vəziyyətdə də ağrı ola bilər.

2. Quru və sərt xırçıltı artrozu sübut edən əlamətlərdən biridir, o, oynaq səthinin sürtünməsi nəticəsində əmələ gəlir. 2-ci, 3-cü mərhələlərdə artıq xırçıltı aydın eşidilir.

3. Oynaqda hərəkətin məhdudlaşması. Xəstəliyin ilk dövrlərində oynaqda hərəkət məhdudiyyəti zəif olur, xəstəlik dərinləşdikcə məhdudiyyət artır.

4.Oynağın deformasiyası.

Artroza diaqnoz qoymaq üçün bir sıra laborator və instrumental müayinələrdən istifadə edilir: MRT, Rentgen, qanın ümumi analizi və s.

Artrozun müalicəsi artroloq və ya revmatoloq tərəfindən aparılır.