Azərbaycan Tibb Universitetinin (ATU) "Təbib" qəzetinin baş redaktoru, Əməkdar jurnalist, şair Eldar İsmayıl Böyüktürk vəfat edib.

Bu barədə Aztibb.az-a ATU-dan bildirilib.

Eldar İsmayıl fevralın 20-də 79 yaşında dünyasını dəyişib.

Qeyd edək ki, E.İsmayıl 10 mart 1942-ci ildə Göyçə mahalının Çəmbərək rayonunun Ağbulaq kəndində anadan olub. O, 1972-1977-ci illərdə Azərbaycan Dövlət Universitetində təhsil alıb. Jurnalistin ilk mətbu əsəri Eldar Ağbulaqlı imzası ilə "Lenin yolu" qəzetində dərc edilən 1961-ci ildə "Kəndimiz" adlı şeiri olub. 

O, "Xüsusi mükafat"a layiq görülmüş "Göyçənin qisası qalır" və "Səttar oğlu" tarixi romanlarının, "Məndən ötrü Ermənistan yoxdu, yox", "Ağrı dağı qədər ağrılarım var", "Ermənistan türklərinin 1988-ci il soyqırımı" kimi publisistik əsərlərin müəllifi idi.

E.İsmayıl, həmçinin ATU-nun nəşri olan "Təbib" qəzetinin baş redaktoru idi. 2010-cu ilin sentyabrın 20-də ona Prezident İlham Əliyevin sərəncamı ilə "Əməkdar jurnalist" fəxri adı verilmişdi.