Adətən döş sümüyü arxasında yanğı hissi və yanmanın qida borusu boyu yuxarıya doğru yayılması mədə qıcqırması adlanır. Yanaşı olaraq mədədə doluluq hissi, ağızda acılıq və ya turş dad hiss oluna bilər. Xəstə əyiləndə və ya uzananda döş sümüyü arxasında yanma hissi artır.

Aztibb.az mədə qıcqırmasının qarşısını almaq üçün faydalı məsləhətləri təqdim edir:

-Az-az və tez- tez yemək yemək;

-Acı, yağlı və qızardılmış yeməklərdən, alkohollu, turş və qazlı içkilərdən, sarımsaq, çiy soğan, şokolad, qəhvə, tünd çay qəbulundan uzaq durmaq;

-Yeməkdən sonra əyilib iş görməmək;

-Axşam yeməyini yatmazdan 2-3 saat əvvəl qəbul etmək;

-Çarpayının baş hissəsini 10 sm qaldırmaq;

-Qarın nahiyəsini kəmərlər, korset və bandajlar taxmamaq.

Reseptlər:

Kartof şirəsi:

1 ədəd çiy kartofun şirəsi çəkilir və səhər acqarına qəbul edilir;

1-2 xörək qaşığı kartof şirəsi yeməkdən yarımsaat əvvəl qəbul edilir.

Toxum qarışığı:

Bərabər miqdarda razyana, bostan şüyüdü, cirə toxumları qarışdırılır, qarışıqdan 1 xörək qaşığı 1 stəkan qaynar suda 20 dəqiqə dəmlənir, hər gün 1-2 stəkan süzülmüş dəmləmə kiçik qurtumlarla içilir.

Bitki qarışığı:

Hərəsindən 1 xörək qaşığı dazıotu, bağayarpağı və çobanyastığı çiçəkləri qarışdırılır, üzərinə 2 stəkan qaynar su əlavə edilərək 2 saat dəmlənir. Süzüldükdən sonra gündə 2-3 dəfə yeməkdən əvvəl yarımstəkan qəbul edilir.