Koronavirus pandemiyasının qarşısının alınması məqsədilə ölkəmizdə həyata keçirilən vaksinasiya tədbirləri çərçivəsində Zaqatala rayonunda əhalinin COVID-19 infeksiyasına qarşı peyvənd olunması prosesi davam edir. Əhalinin peyvəndlənməsi rayon mərkəzi xəstəxanasının infeksion xəstəliklər şöbəsinin binasında xüsusi olaraq ayrılmış vaksin otaqlarında həyata keçirilir. 

Aztibb.az-ın məlumatına görə, bu günədək Zaqatala rayonu üzrə tibb işçilərinə və yaşlı vətəndaşlara 3037 doza vaksin vurulub.

İlkin mərhələdə 1520 tibb işçisinə peyvəndin birinci dozası vurulub. Fevralın 17-dən etibarən onlara vaksinin ikinci dozasının vurulmasına başlanılıb və bu günədək 741 tibb işçisi təkrar peyvənd olunub. Eyni zamanda, indiyədək yaşı 65-dən yuxarı olan 762 vətəndaşa da peyvəndin birinci dozası vurulub və proses davam edir.

Qeyd edək ki, peyvəndləmə prosesində Çinin “Sinovac” şirkətinin istehsal etdiyi “CoronoVAC” vaksinindən istifadə olunur. Bu vaksin effektivliyi ilə digərlərindən seçilir.