Öd kisəsi polipləri kisənin daxili divarını örtən epitel hüceyrələrindən əmələ gəlir və kisənin boşluğuna doğru inkişaf edir. Adətən bu poliplərin 93-94 %-i xoşxassəli olur. Ölçüləri 12 mm və daha kiçik olan poliplər xoşxassəli qəbul edilsə də, sıx təqibə ehtiyac var.

Bu barədə ümumi cərrah, uzman Elnur Piralıyev sosial şəbəkədə məlumat verib.

Həkimin sözlərinə görə, 2 sm-dən böyük olan poliplərin xərçəngə çevrilmə ehtimalı yüksəkdir.

Öd kisəsi polipləri tərkibi və quruluşuna görə də önəm daşıyır. Belə ki, xolesterol tərkibli poliplər xoşxassəli, adenomatoz və inflamator poliplər isə bədxassəli gedişata malikdirlər.

Yağ metobolizma pozğunluğu olanlar və ailəsində öd kisəsi problemi olan insanlarda öd kisəsi polipləri daha riskli hesab olunur.

Diaqnozun qoyulmasında ultrasəs müayinəsi kifayətdir. Lakin cərrah məsləhət görərsə MRT oluna bilər:

“Bu xəstələrdə cərrahi əməliyyat qərarı çox zaman poliplərin ölçüləri və sayına görə verilir.

Aşağıdakı hallarda cərrahi əməliyyat məsləhət görülür:

Polip 1 sm-dən dən böyük olarsa;

Polip 1 sm-dən kiçik, ancaq çox sayda olarsa;

Polip 1 sm-dən kiçik olub, 1 ədəd olsa belə xəstənin biliyar kolik şikayətləri varsa.

O, həmçinin əlavə edib ki, qeyd olunanlar ümumi məlumatlar olsa da, hər bir xəstə haqqında individual olaraq qərar verilməlidir.