İsrailin Bar-İlan Universiteti və Ziv Tibb Mərkəzinin alimləri peyvənd üzərində apardıqları tədqiqatın ilkin nəticələrini təqdim edib.

Aztibb.az xəbər verir ki, xəstəliyi nə qədər əvvəl keçirdiyi və bədəndə nə qədər anticisim yarandığından asılı olmayaraq, koronavirus xəstəliyindən əziyyət çəkənlərdə və daha sonra peyvənd olunanlarda ilk dozadan güclü immunitet reaksiyası qazanıldığı məlum olub. Tədqiqat "Eurosurveillance" elmi jurnalında dərc edilib.

Peyvəndin ilk dozasına reaksiya tədqiqatda iştirak edənlərin hamısında o qədər yüksək olub ki, peyvənd protokolunun yenidən nəzərdən keçirilməsi təklif olunub. COVID-19-dan yaxşılaşan və sonradan peyvənd olunan bəzi insanlar üçün çox güman ki, yalnız bir dozanın kifayət edəcəyi fikri irəli sürülüb.

Bu nəticələr onu göstərir ki, bir çox ölkə peyvənd alınmasına qənaət edəcək və ehtiyac duyanların hamısının daha sürətli vaksinasiya olunmasına imkan verəcək. Tədqiqat eyni zamanda immunitet reaksiyasının etnik qruplar arasında oxşar olduğunu sübut edib.