Anemiya (qan azlığı) özü müstəqil xəstəlik və ya diaqnoz deyil. Hansısa xəstəliyin əlamətidir. Qocalarda anemiya normal hal hesab olunmur. Bu halda qan azlığını yaş ilə əlaqələndirib səthi yanaşmaq olmaz, səbəbi araşdırmaq lazımdır.
Anestezioloq-reanimatoloq Şahin Məmmədov sosial şəbəkədə anemiyanın səbəbləri və görüləcək tədbirlərlə bağlı məlumat paylaşıb.
Həkimin sözlərinə görə, hamilələrdə qanın plazması 2 dəfə artdığı üçün Hb miqdarında azalma anemiya sayılmır. Hansısa hamilə qadında anemiya var deməyimiz üçün Hb-nin 11.5 dən az olması lazımdır. Hamilə olmayan qadınlarda anemiya 12.5 g/dl-dən, kişilərdə isə 13.5-dən azdırsa, bu, anemiya sayılır:
“Deməli, kişilərdə Hb-nin aşağı həddi qadınlarda olduğundan çoxdur. Çünki onlarda menustrasiya ilə qan itkisi olmur və kişi cinsi hormonu olan testosteron qanyaranmanı - hemopoezi sürətləndirir.
Anemiya zamanı oksigen saturasiyası və arterial qanda oksigenin parsial təzyiqi azalmalı deyil. Əgər saturasiya azdırsa, səbəb araşdırılmalıdır.
Anemiya zamanı qan köçürmək bütün insanlarsa Hb 7-dən aşağı düşdükdə göstərişdir. Əgər ürəyin işemik xəstəliyi varsa, belə pasiyentlərdə göstərici 10-dan aşağı düşərsə, qan köçürmək tələb oluna bilər. Çünki anemiya ürək döyüntüsünü artırır, ürəyin işemik xəstəliyində karonar qan axını azaldığı üçün ürəkdöyüntüyə yol vermək olmaz”.
Ş.Məmmədov həmçinin əlavə edib ki, ağır koronavirus pnevmoniyasında da hemoqlobin 10-dan azdırsa, qan köçürülməlidir. Qan köçürülməsi oksigen saturasiyasını və PaO2-ni qaldırmayacaq, lakin qanın oksigen tərkibi artacaq.