Ürək-damar xəstəliklərindən özümüzü necə qoruya bilərik? - Həkim-funksionalistdən tövsiyələr - aztibb.az AZƏRBAYCANIN SƏHİYYƏ XƏBƏR PORTALI

Ürək-damar xəstəliklərindən özümüzü necə qoruya bilərik? - Həkim-funksionalistdən tövsiyələr

11.02.2021 14:42

Hazırda bütün dünyada ürək-damar sistemi xəstəlikləri ölümə səbəb olan xəstəliklər sırasında birinci yeri tutur. Ürək xəstəliyi riski yaş, cins, xolesterol səviyyəsi, qan təzyiqi, siqaret çəkmək və ya şəkərli diabetin olması kimi bir çox amillərdən asılıdır.

Aztibb.az xəbər verir ki, bu barədə Mərkəzi Gömrük Hospitalının həkim-funksionalisti Nigar Rəhmətova məlumat verib. O, ürək xəstəlikləri zamanı və ya onun qarşısını almaq üçün bir sıra risk faktorlarına diqqət yetirməyin vacibliyini bildirib.

Ürək xəstəliyi riskinin azaldılmasının sadə və effektiv yolları bunlardır:

Siqaret çəkməmək;
Fiziki cəhətdən aktiv olmaq;
Arterial təzyiqi bilmək və idarə etmək;
Fiziki aktivlik səviyyənizə uyğun şəkildə liflə zəngin olan, daha az yağlı, xüsusilə doymuş və trans yağları olmayan, az duzlu, çoxlu meyvə və tərəvəz daxil olan qidalardan istifadə etmək.
Qanda şəkər səviyyəsini idarə etmək;
Alkoqol istifadəsini məhdudlaşdırmaq;
Stresi azaltmaq.

N.Rəhmətova ürək xətəliklərindən qorunmaq üçün öz tövsiyələrini verib: "Həkiminizin tövsiyələrinə uyğun olaraq arterial təzyiqinizi yoxlayın, qanda xolesterol və şəkərinizi test edin, vaxtaşırı EKQ, EXO KQ müayinələrindən keçin. Əgər artıq çəkiniz varsa, onu azaltmaq lazımdır. Çalışın qida rasionundan un məmulatlarını çıxarasınız, çörəkdən imtina edə bilmirsinizsə, xəmir yeməklərindən və şirniyyatdan istifadə etməyin. Yağlı süd məhsullarını yağlılığı daha az olan süd məhsulları ilə əvəz edin. Çalışın, gün ərzində az-az, tez-tez qidalanın. Yağlı, duzlu, qızardılmış qidalardan imtina edin, daha çox balıq yeməkləri və dəniz məhsullarına üstünlük verin. Yeməklərdə duzun həcmini minimuma qədər azaldın. Yeməklərinizə kaliumla zəngin olan qidaları daxil edin. Kalium ürəyin normal fəaliyyəti üçün ən vacib minerallardan biridir. Təzə göyərti, xüsusilə ispanaq və cəfəri, banan, brokkoli, sobada bişirilmiş kartof, sitrus meyvələri, kişmiş, ərik və ərik qurusu, xurma və s. bu vacib elementlə zəngindir.

Əsəbdən, stresdən uzaq olmağa çalışın, arada istirahət edin, yuxu rejiminə əməl edin. Hazırda pandemiya dövründə yaşayırıq və karantin rejiminin bir çox məhdudiyyətlərinə əməl etməliyik. Dostlarınızla, qohumlarınızla tez-tez görüşə bilmirsiniz, böyük ticarət mərkəzlərinə gedə, səyahətə çıxa bilmirsiniz. Lakin bütün bunlar sizi qıcıqlandırmasın. Özünüzü qoruyun, ilk növbədə isə, ömür boyu 1 dəqiqə belə fasilə vermədən, dincəlmədən işləyən ürəyinizi qoruyun".