Fevralın 4-də 2000-dən artıq yerli səhiyyə işçisinin COVID-19 pandemiyasına qarşı profilaktik və cavab tədbirlər üzrə potensialının artırılması üçün həyata keçirilən PROACT Təlim Proqramı çərçivəsində UNICEF-in Azərbaycandakı nümayəndəsi Edvard Karvardin, ABŞ Beynəlxalq İnkişaf Agentliyinin (USAID) Azərbaycan üzrə missiyasının direktoru Caydev Sinqx və layihə meneceri Emin Məmmədli və Tibbi Ərazi Bölmələrinin İdarəetmə Birliyinin (TƏBİB) tibbi xidmətlər departamentinin rəhbəri Firəngiz Əliyeva Sumqayıt şəhər 1 saylı doğum evini ziyarət ediblər.

Aztibb.az xəbər verir ki, UNICEF-in Azərbaycandakı nümayəndəliyindən bildirilib ki, USAID tərəfindən maliyyələşdirilən, Ümumdünya Səhiyyə Təşkilatının (ÜST) texniki dəstəyi və TƏBİB ilə birgə həyata keçirilən proqramın məqsədi infeksiyaların profilaktikası və onlara qarşı mübarizə; COVID-19 xəstəlik hallarının fərdi idarə olunması; əsas reanimatoloji tədbirlər; geniş reanimatoloji tədbirlər; xəstəxanaların fövqəladə hallara hazırlığı; tibbi nəzarət; fəal kütləvi müayinə (skrininq); testləşdirmə; təmas qrupların epidemioloji izlənilməsi; risklər haqqında məlumatlandırma kimi mövzularda məlumatlılığın artırılmasıdır. Növbəti dörd ayda müasir IT və tibbi avadanlıqla təchiz olunmuş 12 rayon tibb müəssisəsində Təlim Mərkəzinin açılması planlaşdırılır.

Bu proqram UNICEF-in, İcbari Tibbi Sığorta üzrə Dövlət Agentliyinin və Səhiyyə Nazirliyinin sıx tərəfdaşlığı üzərində qurulub.

İlk təlimçilər üçün təlimə (TÜT) ötən ilin dekabrında start verilib. Rayon təlim mərkəzlərində təlimin həyata keçirilməsinə 24 milli mütəxəssis təlimçinin cəlb edilməsi nəzərdə tutulur.