Həkim bildirib ki, təbabətin keyfiyyət baxımından inkişafı həmişə “sıçrayışlar” şəklində baş verib: yüzilliklər boyu davam edən “qara ölüm” – taun və vərəm xəstəliklərinin yayılması antibiotiklərin kəşfindən sonra sona çatdı, qanqrenalar dövrü aseptika və antiseptika tətbiq edilməyə başladıqdan sonra bitdi, palpasiya və auskultasiya üsullarının məhdudiyyətləri rentgenoloji görüntüləmə metodları hesabına aradan qalxdı. Çox ehtimal ki, COVID-19 pandemiyası növbəti sıçrayışa – unikal, tamamilə yeni və effektiv, təhlükəsiz, keyfiyyətli, rəqəmsal, daha rahat şüa diaqnostikası sisteminin yaradılmasına zəmin yarada bilər:

 

"Bir əsrdən çoxdur ki, rentgenoqrafiya mövcuddur və tibb sahəsində bu üsuldan geniş istifadə edilir. Bir sıra xəstəliklərin diaqnostikasında kompüter tomoqrafiyası ilə müqayisədə standart rentgenoqrafiya müəyyən diaqnostik məhdudiyyətlərə və daha az həssaslığa malikdir.

 

Lakin bu üsulun bir çox üstünlükləri də vardır: əlçatan olması, çoxlu sayda pasiyentin müayinə oluna bilməsi, daşına bilən rentgen qurğularından istifadə imkanı (stasionarda, reanimasiyada, ağır xəstələrin yerləşdiyi yerdə quraşdırılması) və nəticədə müxtəlif patologiyaların ilkin diaqnostikasının mümkünlüyü.

 

Şüa müayinəsi zamanı aşkar edilən bütün əlamətlər, o cümlədən KT-simptomlar hər hansı infeksiya üçün spesifik deyil və koronavirus diaqnozunun qoyulması üçün əsas vermir. Orqanların şüa müayinəsinin nəticələri hazırkı pandemiya zamanı RNT SARS-CoV-2 müayinəsinin nəticələrini əvəz etmir.

 

Eyni zamanda, rentgenoqrafiya və ya KT müayinəsi zamanı döş qəfəsi orqanlarında dəyişikliklərin olmaması COVID-19 infeksiyasının olmasını və bu müayinədən sonra pasiyentdə onun inkişaf edə biləcəyini istisna etmir. Bütün bunlar pasiyentlərin özünümüalicə ilə məşğul olmaması üçün əsas səbəblərdir. Hər hansı virusu, infeksiyanı özbaşına müalicə etməyin, bütün müayinələri, o cümlədən şüa diaqnostikası metodlarını yalnız həkimin göstərişi ilə edin. Özünüzü və yaxınlarınızı qoruyun, həkimlərə güvənin, etibar edin".