"İlk növbədə qeyd etmək lazımdır ki, koronavirusa qarşı vurulan peyvənd heç bir orqana və ya yanaşı xəstəliyə təsir etmir, yalnız immunitetə təsir göstərir. Azərbaycanda tətbiq olunan "Sinovac" peyvəndi uzun illər boyu sınaqdan keçmiş üsul ilə hazırlanıb. Bu inaktiv peyvənddir, yəni tərkibi kimyəvi yolla tam zərərsizləşdirilmiş virusların antigenlərindən ibarətdir. Belə bir peyvənd heç bir halda sağlam insanı xəstələndirə bilməz.

 

Peyvənd olunmuş insanların daha sonra heç vaxt koronavirusa yoluxmayacağı və bu xəstəliyi keçirməyəcəyi fikri də yanlışdır. Koronavirusa qarşı peyvəndin ilk dozası 21 gün ərzində insan orqanizmində 60% immunitet formalaşdırmağa başlayır, ikinci dozadan sonra isə peyvənd olunmuş insanda 90% immunitet yaranır. Peyvəndi vurdurmaqla insanlar koronavirus xəstəliyinin ağırlaşmalarının, ən azından ölüm hallarının qarşısını almış olurlar. Onlar yenidən koronavirusa yoluxa bilərlər, lakin bu zaman xəstəliyi ağır deyil, yüngül vəziyyətdə keçirəcəklər".