Çinin paytaxtı Pekində yüksək patogen quş qripinə (H5N8) yoluxmalar qeydə alınıb.

Bu barədə ölkənin Kənd Təsərrüfatı Nazirliyi məlumat yayıb. Bildirilir ki, H5N8 virusu Pekinin turizm məkanlarından olan "İmperatorun Yay Sarayı" parkının ərazisindəki bir neçə qu quşunda aşkarlanıb, onlardan üçü ölüb. Səlahiyyətli qurumlar dərhal ərazidə cavab tədbirlərinə başlayıblar. Ərazi dezinfeksiya edilib, ölü quşlar təhlükəsiz şəkildə məhv edilib.

Qeyd edək ki, quş qripi (avian influenza) müxtəlif növ quşların və heyvanların kəskin gedişli kontagioz xəstəliyidir. Xəstəliyin törədicisi əksər hallarda vəhşi quşlar vasitəsilə yayılır. Ev quşlarının yoluxması da xəstə vəhşi quşlarla yaranan birbaşa təmas, həmçinin onların ifrazatları ilə çirklənmiş ətraf mühitdən qaynaqlanır. Beynəlxalq tələblərə görə, quş qripinin yüksək və aşağı patogenli tipləri ilə yoluxma aşkar edildiyi halda bütün quşlar tələf edilməlidir.