Professor Surxay Musayev 1951-ci il fevralın 1-də Samux rayonunun Füzuli kəndində anadan olmuşdur.

 

1968-1974-cü illərdə N.Nərimanov adına Azərbaycan Dövlət Tibb İnstitutunun ( indiki Azərbaycan Tibb Universiteti) Pediatriya fakültəsində təhsil almışdır. Təhsil illərində dərs əlaçısı, tələbə elmi cəmiyyətinin fəal üzvü və universitetin ictimai həyatında fəal iştirak edən tələbə kimi Nəriman Nərimanov adına təqaüdə layiq görülmüşdür. Universiteti fərqlənmə diplomu ilə bitirdikdən sonra adlı təqaüdçü kimi Elmi Şuranın qərarı ilə elmi-pedoqoji-tibbi fəaliyyətlə məşğul olmaq üçün hospital Pediatriya kafedrasında saxlanılmışdır.

 

1977-ci ildə I Uşaq Xəstəlikləri kafedrasının assistenti seçilmişdir. Kafedrada fəaliyyətinin ilk vaxtlarından kafedranın bir qrup əməkdaşı ilə birlikdə təbabətin ən aktual problemlərindən biri olan arterial hipertoniyanın uşaqlarda gediş xüsusiyyətlərini öyrənməyə başlamışdır.

 

1981-ci ildə SSRİ Ali Sovetinin Fərmanı ilə “Əməkdə fərqlənməyə görə” medalı ilə təltif olunmuşdur.

 

1985-ci ildə Moskva şəhərində SSRİ Tibb Elmləri Akademiyasının Elmi-tədqiqat Pediatriya İnstitutunda “Uşaq və yeniyetmələrdə ilkin arterial hipertoniya zamanı kallikrein-kinin sisteminin vəziyyəti” mövzusunda dissertasiyamüdafiə edərək tibb elmləri namizədi alimlik dərəcəsi almışdır.

 

1986-cı ildə I Uşaq Xəstəlikləri kafedrasının dosenti seçilmişdir. Keçmiş SSRİ Səhiyyə və Təhsil Nazirliklərinin, Respublika Səhiyyə Nazirliyinin Fəxri Fərmanları, “Səhiyyə əlaçısı” döş nişanı (1987) ilə təltif olunmuşdur.

 

1988-1992-ci illərdə o, İ.M.Seçenov adına Moskva Tibb Akademiyasının (indi I Moskva tibb universiteti) uşaq xəstəlikləri klinikasının doktorantı olmuş və “ Uşaqlarda birləşdirici toxumanın diffuz xəstəlikləri (sistem qırmızıqurd eşənəyi, dermatomiozit, sistem sklerodermiyası) zamanı həzm orqanlarının vəziyyəti” mövzusunda doktorluq dissertasiyası üzərində işləmişdir.

 

1992-ci ildə həmin akademiyada müvəffəqiyyətlə dissertasiya müdafiə edərək tibb elmləri doktoru alimlik dərəcəsi almışdır.

 

1992-ci ildə I Uşaq Xəstəlikləri kafedrasının professoru vəzifəsinə seçilmişdir.

 

Professor Surxay Musayev respublika və bir çox xarici ölkələrdə çap olunmuş 150-dən çox elmi əsərin, o cümlədən dərs vəsaitlərinin, metodik tövsiyyələrin və monoqrafiyanın müəllifidir. Rəhbərliyi altında 6 elmlər namizədi yetişmiş, 4 nəfər gənc tədqiqatçı isə namizədlik dissertasiyası üzərində işləyir. Onlarla doktorluq və namizədlik dissertasiyalarının rəsmi opponenti və rəyçisi olmuşdur. 

 

2000-ci ildə Respublika Prezidentinin Sərəncamı ilə “Əməkdar həkim”, 2010-cu ildə “Əməkdar elm xadimi” fəxri adına layiq görülmüşdür. Azərbaycan Həmkarlar İttifaqı Konfederasiyasının qərarı ilə “Həmkarlar İttifaqlarının 100 illiyi” və “Həmkarlar İttifaqında xidmətlərinə görə” medalları ilə təltif olunmuşdur.

 

Hörmətli Surxay müəllimi 70 illik yubileyi münasibətilə ATU Tədris Terapevtik Klinikasının bütün kollektivi adından səmimi qəlbdən təbrik edir, ona şəxsi və iş həyatında daimi uğurlar, yeni-yeni nailiyyətlər və möhkəm can sağlığı arzulayırıq.

 

Yubileyiniz mübarək!