Çinin Şanxay şəhərində iki xəstəxana yeni koronavirus növü şübhəsi ilə karantinə alınıb.

Aztibb.az xəbər verir ki, bu barədə “Global Times” qəzeti məlumat yayıb.

Qeyd olunub ki,  Fudan Universiteti Şanxay Xərçəng Mərkəzi və Ciao Universiteti Tibb Fakültəsinə bağlı Renci Xəstəxanasında şübhəli halların ortaya çıxması səbəbi ilə ambulator xidmətlər dayandırılıb. Həm xəstəxana binaları, həm də ətrafdakı bəzi yaşayış məntəqələri mühasirəyə alınıb, xəstəliklərə qarşı mübarizə və profilaktika qrupları araşdırmalara başlayıb. 

Renci Xəstəxanasının məlumatına əsasən, iki səhiyyə işçisindən götürülən test nəticələrinin cavabı şübhə yaradıb.

Qeyd edək ki, hər iki xəstəxana Çinin müxtəlif bölgələrindən xəstələrin müalicə üçün gəldiyi etibarlı sağlamlıq mərkəzləri kimi tanınır. Rəsmi statistik məlumatlar göstərir ki, Şanxay Xərçəng Mərkəzində 2019-cu ildə 1 milyon 570 min xəstə ambulator müalicə olunub.

Çin Milli Səhiyyə Komissiyasının (NCH) açıqlamasına görə, son 24 saat ərzində Çində 103 nəfər COVID-19-a yoluxub, virus səbəbiylə heç kim ölməyib.