Mənşəyindən asılı olmayaraq köpün bütün növlərini müalicə etmək üçün xalq təbabətində boymadərən içkisindən istifadə olunur. 

Aztibb.az xəbər verir ki, bu barədə həkim-fitoterapevt Fizuli Hüseynov məlumat verib. 

"Boymadərən çox faydalı bitkidir. Onun bütün şəfalı xüsusiyyətləri suda dəmləməsində mövcuddur. Boymadərən içkisi sulu dəmləmədən fərqlənir. Boymadərən istənilən ağır yeməyi həzm etməyə kömək edir", - deyə həkim bildirib.

Onun sözlərinə görə, böymadərən içkisi yemək zamanı 2 xörək qaşığı içilsə, yeməkdən sonra heç bir köp əlamətləri olmur, mədə-bağırsağı işləməyə məcbur edir, bununla da sancı və köp əlamətlərini aradan götürür. Hətta bağırsaqlarında şiş xəstəliyi olanlar belə köpdən əziyyət çəkirlərsə, yenə də yemək zamanı 2-3 qaşıq içsələr köpdən azad olarlar. Dadı xoşa gəlmədikdə suya qarışdırıb içmək olar.

F.Hüseynov, həmçinin içkinin hazırlanma qaydasını təqdim edib: "100 qram boymadərən otu 1 litr suya tökülüb qaynadılır, qaynama zamanı əmələ gələn su buxarı tutulub kondensasiya edilir (buxar soyuq suyun içindən keçirilir)".