Onun sözlərinə görə, mütəxəssislər dəfələrlə bildiriblər ki, bu virusun yoluxma yollarından biri də gözlər, gözün selikli qişasıdır. Həmçinin, koronavirusun fəsad yaratdığı orqanlar arasında gözlər də var.

 

Koronavirusa yoluxmuş xəstələr də göz patologiyalarından əziyyət çəkirlər. Belə xəstələrdə daha çox konyunktivitlərə rast gəlirik. Nadir hallarda keratit, nevrit, uveit, retinit kimi ağırlaşmalar müşahidə olunur.Viruslu konyunktivitin əlamətləri kimi gözdə sulanmanı, qızartını, göz qapaqlarında şişkinliyi, selikli ifrazatı, bəzən ağrı olmasını və işığa həssaslığı göstərmək olar. Bu zaman müalicə əsasən xəstəliyin kəskinliyindən asılı olaraq iltihab əleyhinə qeyri-steroid göz damlaları və süni göz yaşı damlaları ilə təyin edilir:

 

"Göz qapaqlarına həkimin göstəriş bildiyi müxtəlif kompreslər də qoymaq məsləhətdir. Bəzi hallarda antibakterial dərman da təyin edilir. Ağırlaşmalar olmadıqda, bu xəstəlik 14-21 günə tam keçib gedir. Düzgün və vaxtında aparılmayan müalicə isə keratit, uveit kimi patologiyaya səbəb ola bilər. Koronavirus sadəcə gözün səthini deyil, həmçinin qana daxil olaraq daxili strukturunu da zədələyir. Ona görə də, virusun gözlər vasitəsilə daxil olması nəticəsində gözün tor qişası və görmə siniri zədələnə bilər.

 

Eyni zamanda, görmənin zəifləməsinə səbəb həmçinin koronavirusa qarşı istifadə edilən preparatlar da ola bilər. Buna misal olaraq, koronavirusun müalicəsi zamanı istifadə olunan hidroksixlorini göstərmək olar. Həmin dərman preparatından uzun müddət istifadə isə retinopatiyaya səbəb ola bilər. Bəzi insanlar linzadan istifadə edir.

 

Onlar koronavirusa yoluxan zaman eynək korreksiyasına keçməlidirlər. Konyunktivit keçirən linza istifadəçiləri təkrar eyni linzadan istifadə etməməlidir. Eynək istifadəçiləri isə istifadə etdikləri eynəkləri hər gün yuyub təmizləməlidirlər. Unutmayaq ki, göz insan orqanizminin ən zərif, ən mükəmməl, ən gözəl vəzifəni – görməni icra edən orqandır. Gözlərinizi qoruyun ki, ətraf aləmin gözəlliklərini görə biləsiniz".