Uzun zamandır tibb elminə məlumdur ki, çay təzyiqi və xolesterin səviyyəsini aşağı salmağa qadirdir və çəkinin azalmasına kömək edir. Lakin onun beyinə təsir haqqında ilk dəfə tədqiqatlar aparılıb. 1000 könüllü üzərində aparılan müşahidələr göstərib ki, gündə 5-dən çox fincan çay içən yaşlı insanlar koqnitiv bacarıqlar tələb edən testlərin öhdəsindən daha yaxşı gəlirlər.

Aztibb.az meddaily.ru-ya istinadla xəbər verir ki, Nyukasl Universitetinin yeni tədqiqatına görə, gündə minimum 5 fincan çay içən 85 yaşdan böyük insanlar daha güclü və uzun müddətli diqqət konsentrasiyasına malikdirlər.

Həmçinin, tədqiqat zamanı çay həvəskarları beyin və hərəkətlərin əlaqəsini göstərən daha inkişaf etmiş psixomotor bacarıqlar nümayiş etdiriblər. Üstəlik, hərəkətlər daha dəqiq, reaksiyalar isə daha sürətli olub.

Alimlərin sözlərinə görə, çay yaddaşın ümumi göstəricilərinə təsir etməsə də, çayın bir çox faydalı birləşmələrlə zəngin olduğu məlumdur.

İstisna edilmir ki, tez-tez söhbətlərlə müşayiət olunan çayın içilməsi mərasimi də yaşlı insanların vəziyyətinə müsbət təsir edir.