Kəklikotu əsrlərdir ki, ən faydalı bitkilərdən hesab olunur. Kəklikotu hər zaman daha çox qrip, zökəmin dərmanı sayılıb. Bu bitkinin tənəffüs yollarından tutmuş, immunitet sisteminə, ürək-damar, diş əti xəstəliklərinə qədər bir çox faydalarının olduğu məlumdur. Pandemiya dövründə sonsuz faydaları olan kəklikotuna tələbat daha da artıb.

Aztibb.az Türkiyə mətbuatına istinadən xəbər verir ki, Türkiyəli bitkişünas Aktar Özfidancının sözlərinə görə, pandemiya dövründə kəklikotu və kəklikotu yağının satışında ciddi artım yaranıb. O, qeyd edib ki, bu bitki həm immunitet sistemini gücləndirir, həm də tənəffüs yollarının xəstəliklərinə yaxşı təsir göstərir. Mütəxəssis deyib ki, hazırda pandemiya dövründə olduğumuz üçün ən vacib məqam immunitet sisteminin gücləndirilməsidir. Kəklikotu immun sistemini gücləndirməklə yanaşı, tənəffüs sisteminə, ağciyərlərə müsbət təsir edir. Bundan başqa, ürək-damar sistemi, damarların atereosklerozu, qadınlarda menstruasiya pozğunluğu və psixoloji baxımdan narahatlıqlarla bağlı bir çox faydaları var.

Onun sözlərinə görə, kəklikotu yağını həm su ilə qarışdırıb, həm də birbaşa içmək effektivdir. Amma kəklikotu ən çox çay-dəmləmə şəklində istifadə olunur.