Azərbaycanın görkəmli alimlərindən biri, Rusiya Elmlər Akademiyası Bitki Fiziologiyası İnstitutunun laboratoriya müdiri, REA-nın Biologiyanın Fundamental Problemləri İnstitutunun baş elmi işçisi, Azərbaycan Milli Elmlər Akademiyasının Molekulyar Biologiya və Biotexnologiyalar İnstitutunun beynəlxalq Bionanotexnologiya laboratoriyasının müdiri, biologiya elmləri doktoru, professor Süleyman Allahverdiyevin adı “Clarivate Analytics” şirkəti tərəfindən çap olunmuş hesabatda “Highly Cited Researchers” siyahısında ən çox istinad olunan alimlərin sırasında qeyd edilib.

S.Allahverdiyev fotosintez, fiziologiya, biofizika, biokimya və molekulyar biologiya sahələrində tanınmış mütəxəssisdir. Onun tədqiq etdiyi 2-ci fotosistemin (FS-2) elektron-nəqliyyat zəncirində fəaliyyətin əsasını təşkil edən ilkin mexanizmlərin, fotosintez zamanı elektronların təklif olunan energetik və kinetik yerdəyişmə sxemi bütün dünyada fotosintez üzrə dərsliklərə daxil edilib.

Alimin elmi araşdırmalarının nəticələri “Chemical Reviewers”, “Proceedings of National Academy of Science USA”, “The EMBO Journal”, “J Photochem. Photobiol”, “Photosynthesis Research”, “FEBS Letters” kimi nüfuzlu jurnallarda dərc edilir.

S.Allahverdiyev bitkilərin fiziologiyası və biokimyası, fotosintez və nanotexnologiyalara dair elmi əsərlər nəşr edən aparıcı beynəlxalq jurnalların, o cümlədən “Biochimica et Biophysica Acta (BBA-Bioenergetics)”, “International Journal of Hydrogen Energy”, “Journal of Photochemistry and Photobiology B: Biology”, “Frontiers in Plant Physiology”nin redaksiya heyətinin üzvüdür.

350-dən çox elmi məqalənin, 6 ixtiranın və 8 kitabın müəllifi olan S.Allahverdiyev dəvətli professor kimi çalışıb, həmçinin dünyanın 40-dan çox ölkəsində mühazirələr oxuyub.