Bir çox insan nəfəsindən gələn pis qoxudan xilas olmaq üçün yuxudan oyandıqdan dərhal sonra dişlərini fırçalayır.

Aztibb.az Med2.ru-ya istinadən xəbər verir ki, nəfəsdən pis qoxunun gəlməsinin səbəblərindən biri ağız gigiyenasının yaxşı olmamasıdır. Bu isə, anaerob bakteriyaların böyüməsinə və ağız xəstəliklərinin inkişafına səbəb olur. Bu vəziyyətdə dişləri yumaq yalnız bir müddət xoşagəlməz qoxudan xilas olmağa kömək edə bilər.

Ağız və dişlərdə xəstəlik varsa, təcili olaraq diş həkiminə müraciət edilməlidir. Mütəxəssislər hər yeməkdən sonra dişləri fırçalamağı, ildə iki dəfə diş həkiminə müayinəyə getməyi məsləhət görür.

Əgər ağız boşluğunda heç bir problem yoxdursa, o zaman mədə-bağırsaq traktının problemlərinə diqqət yetirilməlidir. Məlumdur ki, nə qədər çox ac qalınarsa, mədə-bağırsaq xəstəliklərinin inkişaf riski də bir o qədər yüksək olar. Uzun müddət ac qalarkan metabolik proseslər pozulur, qaraciyər, mədə və mədəaltı vəzi ilə problemlər yarana bilir. Uzun müddətli aclıq zamanı bədən özündə saxladığı yemək qalıqlarını həzm etməyə başlayır.

Belə ki, nəfəsdən pis qoxunun gəlməsi mədə şirəsinin turşuluğunun artması ilə müşayiət olunan mədə xorası və onikibarmaq bağırsaq xorasının da əlaməti ola bilər.

Mütəxəssislər bildirir ki, hər zaman gigiyenaya diqqət edilməli, müalicə təxirə salınmamalıdır. Nəfəsdən pis iy gələrsə, problemin nə ilə əlaqəli olduğunu dəqiq söyləyəcək mütəxəssislə əlaqə saxlanılmalıdır.