Həkim qeyd edir ki, arxa cəbhədəki ixtisaslaşmış tibbi yardımdan fərqli olaraq, ön cəbhənin şərtləri başqadır. Burada kütləvi xəstə axınında ani qərarlar verilməli və şəraitə uyğun olaraq tibbi yardım göstərilməlidir. Bu işin təşkili isə xüsusi səriştə tələb edir. Məhz bu baxımdan, müharibə başlayan kimi könüllü olaraq ön sıralara yollanan ATU-nun Üz-çənə cərrahiyyəsi kafedrasının əməkdaşı Oqtay Mehdiyevin əməyi olduqca böyükdür: “Oqtay Mehdiyev Gəncə və Füzuli Diaqnostika Xəstəxanalarında işləyib. Hadisələrin bütün qaynar məqamlarında peşə fəaliyyətindən başqa, eyni zamanda təşkilatçılığı və əzmkar mövqeyi ilə seçilib. Oqtay müəllimin Gəncədə dinc insanlarımıza qarşı törədilən vəhşi terror hücumlarının çəkilişini aparması sayəsində bu gün həmin hadisələri bütün dünyaya sübut etmək mümkündür. Bu fotolar həmin günlərdə dünya mətbuatının gündəminə çevrilməklə yanaşı, həm də informasiya müharibəsində haqlı mövqeyimizi əks etdirə bildi”.

 

R.Hüseynli bildirir ki, Oqtay Mehdiyevin danılmaz əməyi sayəsində Füzuli Diaqnostika Xəstəxanasında tibbin bütün sahələrində təmsil olunan həkim və tibb bacılarının səfərbər olması, komanda şəklində intizamlı xidməti baş tutdu: “Tibbi personal oradakı vəziyyətin müsbətə doğru dəyişməsində Oqtay həkimin rolunu çox yüksək qiymətləndirirdi. Bütün heyət bu qədər təlaşın və həyəcanın içində Oqtay müəllimin həm boynuna çəkdiyi işin öhdəsindən necə məharətlə gəldiyinin həm də həmkarlarına necə diqqət və qayğı göstərdiyinin şahididir”.

 

Doktor Rüfət Hüseynli cəbhə bölgəsinin bütün xəstəxanalarında həkim dostlarının adlarının fəxrlə xatırlanıb tanındığını söyləyir: “Müxtəlif istiqamətlərdə çalışan dostlarımızın xoş sorağını eşitmək fəxarət hissi yaradır. Burada ATU-nun Üz-çənə cərrahiyyəsi kafedrasının əməkdaşları olan Məhəmməd Davudovun, Cahid Məmmədovun, Rəşad Məmmədzadənin, habelə ilk günlərdən bu sıralara qatılan Vüqar Qurbanovun, Murad Osmanlının, Elnur Abdullayevin, Tural Məmmədovun, Elvin Quliyevin, Asim Nuriyevin, Malik Şirinovun və adlarını çəkmədiyim digər həmkarlarımızın da qeyd edilməsi yerinə düşər. Məhz onların peşəkarlıqla həyata keçirdikləri əməliyyatlarla bir çox yaralı döyüşçülərimizə ,eləcə də mülki insanlarımıza tibbi yardım göstərilmiş, zamanında ixtisaslaşmış tibbi yardım alınması zərurəti ilə arxa cəbhəyə - ATU-nun ağız, üz-çənə cərrahiyyəsi kafedrasına, habelə Silahlı Qüvvələrin baş hərbi hospitalına təxliyyələr həyata keçirilmişdir”.

 

R.Hüseynli bir məqamı da xüsusi vurğulamağı vacib bilir. Qeyd edir ki, Üz-çənə cərrahiyyəsi stomatologiyanın ən aparıcı, ən çətin bir qolu olmasına rəğmən, məhz stomatologiya ailəsində təmsil olunur: “Vətən müharibəsində ön cəbhədə ilk tibbi yardımın təşkili və həyata keçirilməsində stomatoloq həmkarlarımızın böyük rolu olub. Füzuli Diaqnostika Xəstəxanasına müraciət edən onlarla könüllü stomatoloqu görəndə, oradakı personalın özü çaşqınlıq keçirmişdi. Amma cəmi bir neçə saatdan sonra stomatoloqların burada olmasına görə bütün tibb heyəti sevinirdi. Həkimlərimiz xəstə qəbulunda, ilk yardımda, koordinasiyada, xəstə təxliyyəsində canla-başla çalışırdılar. Burada operativ təşkil olunan həyati vacib tibbi ləvazimatların çatdırılması tədbirləri də xüsusi qeyd edilməlidir. Ən kiçik görünən əmək belə, cəbhədə yüksək dəyərə sahibdir. Bəzən sadəcə yaralı birinin başını sığallamaq kimi...”

 

Müharibə günlərində həmkarlarının fəaliyyətini fəxrlə yada salan dokor R.Hüseynli şəhid həmkarlarının və əsgərlərin ruhu qarşısında ehtiramla baş əyir, qəhrəmanlarımızla qürur duyduğunu bildirir: “Gələcək nəsillərə bu zəfər dastanının canlı şahidi və bir parçası olduğumuzu vüqarla danışa biləcəyik. Var olun, dostlar. Biz bir ailəyik”.

 

Qeyd edək ki, həkimlərimiz elə bu gün də Qarabağda işlərini uğurla davam etdirirlər.