Sinqapur Milli Universitetində aparılan tədqiqatlarına əsasən, probiotiklər və brokkolinin birləşməsi təəccüblü effekti verib. O, qalın və düz bağırsaq xərçənginin müalicəsində kömək edir. Probiotik komponentin əsasında E.coli Nissle bağırsaq bakteriyası dayanır. Alimlər brokkolidən xüsusi ferment hazırlayıblar. Laboratoriya şəraitində sınaqlar göstərib ki, bu qarışım xərçəng hüceyrələrinin 95%-ə qədərini məhv edir.

Aztibb.az meddaily.ru-ya istinadla xəbər verir ki, həkim-diyetoloq Svetlana Fus brokkolinin az kalorili və faydalı maddələrlə zəngin olduğundan bu tərəvəzə hər gün rasionda yer ayırmağı məsləhət görür. Brokkolinin gündəlik istifadəsi bağırsaqların vəziyyətini yaxşılaşdırmağa və çəkini azaltmağa qadirdir. Ən optimal variant brokkolinin çiy halda istifadəsidir.

Brokkolinin tərkibində böyük həcmdə B9 (foli turşusu), C vitaminləri, beta-karotin, həmçinin bağırsaqların işi üçün əhəmiyyətli olan sellülozlar mövcuddur.

S. Fus brokkolinin əks göstərişlərindən də danışaraq qeyd edib ki, o, qalxanvarı vəzin funksiyası pozulmuş insanların (hipotireoz) sağlamlığına mənfi təsir edə bilər: "Brokkolidə olan izotiosinatlar yodun mənimsənməsini ləngidir və bu isə orqanizmdə onun defisitini gücləndirir".